अमेरिका आणि इस्त्रायल या दोन्ही देशांनी मिळून इराणवर हल्ला केला आहे. इराण देखील या दोन्ही देशांना चांगलेच प्रतित्यूत्तर देताना दिसत आहे. गेल्या तीन आठवड्यांपासून या देशांमध्ये युद्ध सुरु आहे. मात्र, या युद्धामुळे दैनंदिन वापरातील अनेक गोष्टींवर परिणाम झाला आहे. आखाती देशात (मध्य पूर्व) सुरू असलेल्या युद्धाने आता कंडोमच्या किंमतींनाही धक्का दिला आहे. कंडोम उत्पादनासाठी लागणाऱ्या कच्च्या मालाच्या भावात ४० ते ४५ टक्क्यांची प्रचंड वाढ झाल्याने, लवकरच कंडोमच्या पॉकेटची किंमत १० ते १५ टक्क्यांनी वाढणार आहे.
1 / 6
छत्रपती संभाजीनगर हे देशातील प्रमुख कंडोम उत्पादन केंद्रांपैकी एक आहे. येथील रेमंड लाईफस्टाइल, सेफगार्ड आणि युनिव्हर्सल या कंपन्या मिळून वर्षाला १०० कोटींहून अधिक कंडोमची निर्मिती करतात. या कंडोमचा पुरवठा केवळ भारतातच नव्हे तर नेपाळ, आफ्रिकन देश आणि इतर अनेक देशांमध्येही होतो.
2 / 6
आखाती युद्धामुळे सिलिकॉन ऑइल, पॅकेजिंग मटेरियल आणि अॅल्युमिनियम लॅमिनेट या महत्त्वाच्या कच्च्या मालाच्या आयातीत मोठा व्यत्यय आला आहे. यामुळे त्यांच्या किंमतीत जबरदस्त वाढ झाली.
3 / 6
उदाहरणार्थ, पूर्वी १८० रुपयाला मिळणारे एक केमिकल आता २७० रुपयांवर गेले आहे. उद्योग क्षेत्रातील सूत्रांनी सांगितले की, कच्च्या मालाच्या किंमतीत ४० ते ४५ टक्क्यांची वाढ झाल्याने उत्पादन खर्च वाढला आहे. याचा परिणाम म्हणून किरकोळ बाजारात कंडोमच्या पॉकेटच्या किंमतीत १० ते १५ टक्क्यांची वाढ अपरिहार्य आहे. यामुळे सामान्य ग्राहकांवर अतिरिक्त आर्थिक बोजा पडणार आहे.
4 / 6
गेल्या काही दिवसांत गॅस, पेट्रोल आणि इतर अत्यावश्यक वस्तूंच्या किंमती वाढल्यानंतर आता कंडोमसारख्या उत्पादनालाही युद्धाचा फटका बसला आहे. छत्रपती संभाजीनगरमधील या कंपन्या केवळ देशांतर्गतच नव्हे तर निर्यातीवरही मोठ्या प्रमाणात अवलंबून आहेत. कच्च्या मालाच्या वाढत्या किंमती आणि पुरवठा साखळीतील अडथळ्यांमुळे उत्पादन आणि निर्यात दोन्हींवर परिणाम होण्याची भीती व्यक्त केली जात आहे.
5 / 6
उद्योग संघटनांनी सरकारकडे कच्च्या मालाच्या आयातीत सवलत देण्याची आणि पर्यायी पुरवठा स्रोत शोधण्याची मागणी केली आहे. मात्र सध्याच्या परिस्थितीत लवकरच कंडोम महाग होणार असल्याचे स्पष्ट चित्र आहे. ही घटना पुन्हा एकदा दाखवते की, दूरस्थ युद्धाचा परिणाम किती दूरपर्यंत आणि किती अनपेक्षित क्षेत्रांवर होऊ शकतो. आता सामान्य माणसाला फक्त पेट्रोल-गॅस नव्हे तर कंडोमसाठीही जास्त पैसे मोजावे लागणार आहेत.
