ट्रोल करणाऱ्यांवर टीका करताना बबनराव लोणीकरांची जीभ घसरली, नेमकं काय म्हणाले? वाचा

भाजपचे परतूरचे आमदार बबनराव लोणीकर अडचणीत सापडले आहेत. सोशल मीडियावर सरकारला ट्रोल करणाऱ्यांवर टीका करताना लोणीकरांची जीभ घसरली आहे. लोणीकर हे मोदींचे अंधभक्त आहेत अशी टीका काही लोकांनी केली होती, त्यांच्यावर टीका करताना लोणीकरांचा तोल गेल्याचे समोर आले आहे. लोणीकरांनी नेमकं काय म्हटलं ते जाणून घेऊयात.

मिळालेल्या माहितीनुसार, सोशल मीडियावर सरकार आणि आपल्या विरोधात लिहिणाऱ्या तरुणांवर लोणीकरांनी भाषणातून टीका केली. जालना जिल्ह्यातील परतुर येथे हर घर सोलर योजनेच्या शुभारंभ प्रसंगी केलेल्या भाषणात बबनराव लोणीकरांची जीभ घसरली.

लोणीकर म्हणाले की, ‘कुचरवट्यावर बसलेली काही रिकामटेकडी कार्टी सोशल मीडियावर मोदी आणि देवेंद्र फडणवीस यांचे अंधभक्त असल्याचे लिहितात. याच कूचवट्यावर बसून सोशल मीडियावर चर्चा करणाऱ्या कार्ट्यांच्या माईचा पगार आणि बापाची पेन्शन बबनराव लोणकर यांनीच केला आहे. तर नरेंद्र मोदींनी तुझ्या बापाला सहा हजार रुपये पेरणीला दिले आहेत, तुझ्या अंगावरचे कपडे, पायातील बुट-चप्पल सुद्धा सरकारमुळेच आहे’ असं लोणीकरांनी म्हटलं आहे.

याआधीही लोणीकरांनी एका सभेत बोलताना ग्रामस्थांना इशारा दिला होता. विधानसभा निवडणुकीत लीड न मिळाल्याने लोणीकरांनी बोरगावात बोलताना म्हटले की, ‘5 वर्षांमध्ये कमळाचं एक बटन दाबायचं तेही केलं नाही. मी गावाला 8 कोटींचा सिमेंट रोड दिला. मला मत द्या किंवा नका देऊ. मी दोन-तीन वेळेस चव पाहणार, नाहीतर गावावर फुली मारणार.’

कोण आहेत बबनराव लोणीकर?

बबनराव लोणीकर भाजपचे परतूरचे आमदार आहेत. 1999, 2004, 2014, 2019 आणि 2024 मध्ये ते परतूरमधून निवडून आले होते. लोणीकर हे देवेंद्र फडणवीसांच्या 2014 ते 2019 या सरकारमध्ये पाणीपुरवठा आणि स्वच्छता मंत्री होते.