उद्धव ठाकरे, शरद पवार, अजित पवारांमध्ये ‘वर्षा’ बंगल्यावर तासभर खलबतं, नेमकी चर्चा काय?

मुंबई : मुख्यमंत्री उद्धव ठाकरे आपल्या मंत्रिमंडळातील काही सहकाऱ्यांसह मंगळवारी पंतप्रधान नरेंद्र मोदी यांची दिल्लीत भेट घेणार आहेत. मराठा आरक्षणाच्या मुद्द्यावरुन ही भेट होणार असल्याची माहिती देण्यात आलीय. त्या पार्श्वभूमीवर आज मुख्यमंत्र्यांचं शासकीय निवासस्थान असलेल्या वर्षा बंगल्यावर मुख्यमंत्री उद्धव ठाकरे, राष्ट्रवादी काँग्रेसचे अध्यक्ष शरद पवार आणि उपमुख्यमंत्री अजित पवार यांत्याच जवळपास तासभर खलबतं झाली. या बैठकीत मराठा, ओबीसी, पदोन्नती आरक्षणासह अन्य महत्वाच्या मुद्द्यांवर चर्चा झाल्याची माहिती मिळतेय. (CM Uddhav Thackeray, Sharad Pawar and  Ajit Pawar meeting at Varsha Bungalow)

मुख्यमंत्र्यांच्या वर्षा या निवासस्थानी पार पडलेल्या बैठकीत मराठा आरक्षण, ओबीसी आरक्षण, पंतप्रधान नरेंद्र मोदींची भेट, जीएसटी आणि राज्यातील कोरोना परिस्थितीवर पुढील पावलांबद्दल चर्चा झाली. या बैठकीचा मुख्य मुद्दा हा पंतप्रधान नरेंद्र मोदी यांच्यासमोर उद्या मुद्द्यांवर भर द्यायचा, आरक्षणासाठी केंद्रानं काय पाऊल टाकणं गरजेचं आहे, केंद्रासोबत याबाबत पुढे ही चर्चा कशी वाढवत न्यायची, यावर चर्चा झाल्याची माहिती मिळतेय. या बैठकीत शरद पवार, मुख्यमंत्री उद्धव ठाकरे, उपमुख्यमंत्री अजित पवार, गृहमंत्री दिलीप वळसे-पाटील, अन्न व नागरी पुरवठा मंत्री छगन भुजबळ, सार्वजनिक बांधकाममंत्री एकनाथ शिंदे उपस्थित होते.

मंगळवारी 11 वा. पंतप्रधानांसोबत बैठक, 12 वा. पत्रकार परिषद

मुख्यमंत्री उद्धव ठाकरे यांच्या नेतृत्वातील शिष्टमंडळ उद्या सकाळी 11 वाजता पंतप्रधान नरेंद्र मोदी यांची भेट घेणार असल्याची माहिती मिळतेय. या शिष्टमंडळात मुख्यमंत्री उद्धव ठाकरे, उपमुख्यमंत्री अजित पवार, मराठा आरक्षण विषयक उपसमितीचे अध्यक्ष आणि मंत्री अशोक चव्हाण, मंत्री एकनाथ शिंदे असतील अशी माहिती मिळत आहे. पंतप्रधान मोदी यांच्यासोबत बैठक पार पडल्यानंतर मुख्यमंत्री उद्धव ठाकरे दुपारी 12 वाजता महाराष्ट्र सदन इथं पत्रकार परिषद घेणार असल्याचंही सांगण्यात आलंय.

महामंडळांबाबत चर्चा?

दरम्यान, काँग्रेस नेते आणि राज्याचे महसूलमंत्री बाळासाहेब थोरात यांनी आज शरद पवारांची भेट घेतली. यावेळी त्यांनी पवारांशी राज्यातील महामंडळांवरील नियुक्त्यांसंदर्भात चर्चा केली. ही चर्चा अत्यंत सकारात्मक झाली असून महामंडळांवरील नियुक्त्या लवकरच जाहीर करण्यात येणार असल्याचं सांगण्यात येत आहे. त्यामुळे शरद पवार आणि मुख्यमंत्री उद्धव ठाकरे यांच्यात महामंडळावरील नियुक्त्यांबाबतही चर्चा झाल्याची शक्यता वर्तवण्यात येत आहे.

संबंधित बातम्या :

मुख्यमंत्री उद्धव ठाकरे मंगळवारी पंतप्रधानांना भेटणार; मराठा आरक्षणावर होणार चर्चा

VIDEO: महामंडळांवरील नियुक्त्या लवकरच जाहीर होणार?; पवार-थोरात भेटीत काय घडलं?, वाचा

CM Uddhav Thackeray, Sharad Pawar and  Ajit Pawar meeting at Varsha Bungalow