‘शरद पवारांचा हा काही पहिलाच प्रयत्न नाही”, विरोधी पक्षाची मोट बांधण्याच्या पवारांच्या प्रयत्नावर काँग्रेसची प्रतिक्रिया
पवार साहेबांचा हा काही पहिला प्रयत्न नाही. ज्या ज्या वेळी राजकीय समीकरण बदलतात, राजकारणात वेगळे वारे वाहू लागतात तेव्हा पवारांनी अशा भूमिका घेतलेल्या आहेत. त्यामुळे यात काही नवीन आहे असं म्हणणं चुकीचं असल्याचं पटोले यांनी म्हटलंय.
मुंबई : राष्ट्रवादी काँग्रेसचे सर्वेसर्वा शरद पवार आता भाजप आणि पर्यायानं पंतप्रधान नरेंद्र मोदी यांच्याविरोधात विरोधकांची मोट बांधण्यसाठी मैदानात उतरल्याचं पाहायला मिळत आहे. आज राजकीय रणनितीकार प्रशांत किशोर यांच्यासोबत दुसऱ्यांदा बैठक पार पडल्यानंतर शरद पवार मंगळवारी 15 विरोधी पक्षांच्या प्रमुख नेत्यांशी बैठक घेणार असल्याची माहिती मिळत आहे. या बैठकीत राष्ट्रमंच या बॅनरखाली एकत्र येण्यावर चर्चा होणार असल्याचं सूत्रांनी सांगितलं. त्यामुळे या बैठकीकडे सर्वांचं लक्ष लागलं आहे. या बैठकीवर बोलताना शरद पवार यांचा हा अशा प्रकारचा पहिलाच प्रयत्न नसल्याची प्रतिक्रिया काँग्रेस प्रदेशाध्यक्ष नाना पटोले यांनी दिलीय. (Nana Patole on Sharad Pawar’s meeting of 15 political parties against BJP)
शरद पवार यांच्या दिल्लीतील निवासस्थानी उद्या दुपारी 4 वाजता ही 15 विरोधी पक्षाच्या नेत्यांची बैठक होणार असल्याची माहिती मिळतेय. महत्वाची बाब म्हणजे या बैठकील काँग्रेस सहभागी होण्याची शक्यता कमी आहे. दरम्यान, शरद पवार राजधानी दिल्लीमध्ये पंतप्रधान नरेंद्र मोदी आणि भाजपविरोधात 15 विरोधी पक्षांची मोट बांधत असल्याबाबत पटोलेंना पत्रकारांनी विचारलं. त्यावेळी पवार साहेबांचा हा काही पहिला प्रयत्न नाही. ज्या ज्या वेळी राजकीय समीकरण बदलतात, राजकारणात वेगळे वारे वाहू लागतात तेव्हा पवारांनी अशा भूमिका घेतलेल्या आहेत. त्यामुळे यात काही नवीन आहे असं म्हणणं चुकीचं असल्याचं पटोले यांनी म्हटलंय.
संजय राऊतांच्या टीकेला प्रत्युत्तर
कोरोना काळात काँग्रेसच्या कार्यकर्त्यांनी रस्त्यावर उतरुन काम केलंय. रक्तदान, ऑक्सिजन पुरवठा, मास्क वाटप, प्लाझ्मा दान अशी अनेक कामं काँग्रेसनं केली आहेत. स्वबळाचा नारा केवळ काँग्रेसनंच नाही तर शिवसेनेनंही दिला आहे. पण फक्त काँग्रेसला टार्गेट करण्याचं काम सुरु आहे. मी सामना वाचत नाही. आम्हाला आमचा पक्ष वाढवायचा असेल तर कुणाला त्रास का व्हावा? कुणी आमच्यावर टीका करत असेल तर आम्ही त्याला महत्व देत नाही. आम्ही जयंत पाटील यांनाही शुभेच्छा देतो की, त्यांनी शिवसेनेसोबत युती जाहीर करुन टाकावी, अशा शब्दात नाना पटोले यांनी शिवसेना आणि राष्ट्रवादी काँग्रेसला प्रत्युत्तर दिलंय.
‘केंद्रीय तपास यंत्रणांचा गैरवापर सुरु’
प्रताप सरनाईक यांनी मुख्यमंत्र्यांना लिहिलेल्या पत्राबाबतही पटोले यांना विचारण्यात आलं. त्यावेळी भाजपसोबत आघाडी करावी, असं सरनाईक यांनी म्हटलंय. त्यामागील मुख्य कारण केंद्रीय तपास यंत्रणांचा ससेमिरा असल्याचं पटोले म्हणाले. भाजप केंद्रीय तपास यंत्रणेच्या माध्यमातून कधी शिवसेना तर कधी राष्ट्रवादीच्या नेत्यांना त्रास देत असल्याचं आम्ही पाहतोय. केंद्रीय तपास यंत्रणांचा गैरवापर सुरु आहे, त्याचा काँग्रेस निषेध करतेय, असंही पटोले म्हणाले.
संबंधित बातम्या :
हिंदुत्वाच्या मुद्द्यावर पुन्हा शिवसेना आणि भाजपा युती होऊ शकते, गिरीश बापटांना विश्वास
Nana Patole on Sharad Pawar’s meeting of 15 political parties against BJP
