ठरलं तर सिद्धरमय्या होणार कर्नाटकचे नवे मुख्यमंत्री, तर डी.के.शिवकुमार उपमुख्यमंत्री, 18 मे रोजी शपथग्रहण ?

मुंबई : कर्नाटकात कॉंग्रेसला घसघसीत यश मिळूनही मुख्यमंत्री पदाची माळ कोणाच्या गळ्यात घालायची यावरून पेच निर्माण झाला होता. मुख्यमंत्री पदासाठी ज्येष्ठ आणि अनुभवी नेते सिद्धरमय्या यांची निवड हायकमांड यांनी केली आहे. ते कुरूबा समुहाचे असल्याने त्यांच्या नाववर शिक्कामोर्तब झाल्याचे सांगण्यात येत आहे. साल 2024 रोजी असलेल्या लोकसभा निवडणूकाच्या पाश्वभूमीवर कॉंग्रेस कोणताही धोका पत्करण्याच्या मनस्थित नसल्याने सिद्धरमय्या यांनाच मुख्यमंत्री करण्याचा निर्णय घेण्यात आला आहे. परंतू लोकप्रियतेत जरी सिद्धरमय्या पुढे असले तरी पक्षात डी.के. शिवकुमार यांना 70 हून अधिक आमदारांचा पाठींबा आहे. त्यामुळे आता या संकटातून कॉंग्रेस त्यांची कशी मनधरणी करतात यावर सर्व विसंबून आहे.

कर्नाटकचे मुख्यमंत्री म्हणून कॉंग्रेस हायकमांडने बुजुर्ग नेते सिद्धरमय्या यांच्या नावावर शिक्कामोर्तब केले आहे. तर त्यांचे प्रतिस्पर्धी डी.के.शिवकुमार यांना उपमुख्यमंत्री पदाची जबाबदारी सोपविण्यात येणार आहे. शिवकुमार साल 2024 पर्यंत पक्षाच्या प्रदेशाध्यक्ष पदाची जबाबदारीही सांभाळतील. त्यांना महत्वाची खातीही देण्यात येणार आहेत. मात्र या निर्णयाने डी.के. शिवकुमार यांचे समर्थक बिथरले आहेत.

ईडी चौकशीचा ससेमिरा

शिवकुमार याआधीच ईडी चौकशीचा ससेमिरा लागल्याने कॉंग्रेस भाजपाला आयता मुद्दा देण्याच्या विचारात नसल्याचे समजते. त्यामुळे शिवकुमार यांचा पत्ता कट झाल्यात जमा आहे. त्यांना आता उपमुख्यमंत्री पद आणि महत्वाची खाती देऊन त्यांची मनधरणी करण्याचा प्रयत्न सुरू आहे.

कोण आहेत सिद्धरमय्या ?

कर्नाटकात जसा कॉंग्रेसला बहुमताकडे वाटचाल सुरू झाली तसे मुख्यमंत्री पदासाठी सिद्धरमय्या यांच्या नावाची चर्चा सुरू झाली. सिद्धरमय्या यांचा जन्म एका गरीब कुटुंबात झाला. 75 वर्षीय सिद्धरमय्या यांनी कर्नाटक मुख्यमंत्री म्हणून याआधी जबाबदारी पार पाडली असल्याने त्यांना सरकार चालविण्याचा अनुभव आहे.

सिद्धरमय्या यांचा जन्म 12 ऑगस्ट 1948 साली म्हैसूर जिल्ह्यातील सिद्दरामनहुंडी गावात झाला. शेतकरी कुटुंबात जन्मलेल्या सिद्धरमय्या वयाच्या दहाव्या वर्षांपर्यंत शाळेत जाऊ शकले नाहीत. नंतर त्यांनी म्हैसूर विद्यापीठातून विज्ञान विषयात ग्रॅज्युएशन पूर्ण केले. त्यांनी कायद्याचाही अभ्यास केला आहे.

साल 1980 ते 2005 पर्यंत ते जनता दलाचे सदस्य होते. कॉंग्रेसचे कट्टर विरोधी होते. माजी पंतप्रधान एच.डी.देवेगौडा यांनी त्यांची जनता दल ( एस ) मधून हक्कालपट्टी केली. त्यानंतर कॉंग्रेसमध्ये ते सामील झाले. 1983 मध्ये ते प्रथम आमदार झाले नंतर 1985 मध्ये कॉंग्रेसचे सरकार आले तेव्हा ते मंत्री झाले. तर 2004 मध्ये कॉंग्रेस – जनता दल ( एस ) सरकारमध्ये ते उपमुख्यमंत्री बनले. कुरुबा समुदायाचे मोठे नेते झाल्यानंतर ते 2013 ते 2018 पर्यंत राज्याचे मुख्यमंत्री राहीले. ते नास्तिक असल्याने त्यांनी पद आणि गोपनियतेची शपथ सत्याला स्मरून घेतली होती.