राम शिंदे पडणार, रोहित पवार जिंकणार, असं भाजपच म्हणतंय : सुप्रिया सुळे

अहमदनगर : भाजपचे मंत्री राम शिंदे पडणार आणि रोहित पवार निवडून येणार, असं मी नाही, भाजपच म्हणत आहे, असं राष्ट्रवादीच्या खासदार सुप्रिया सुळे (Supriya Sule on Ram Shinde) म्हणाल्या. भाजपच्या अंतर्गत निवडणूक सर्व्हेचा दाखला देत सुप्रिया सुळेंनी रोहित पवार यांना निवांत राहण्याचा सल्ला दिला.

सुप्रिया सुळे यांनी भाजपच्या निवडणूक सर्व्हेचा दाखला देत विधानसभा निवडणुकीत भाजपचे सहा मंत्री अडचणीत असल्याचं सांगितलं. ‘मी परवा बातम्या बघत होते. यावेळी भाजपचा एक सर्व्हे आल्याचं सांगितलं गेलं. सहा मंत्रीच पराभवाच्या छायेत असल्यामुळे भाजप चिंतेत असल्याचं यात दाखवलं. हा भाजपने केलेला अंतर्गत सर्व्हे आहे, असं बातम्यांमध्ये म्हटलं. मी नाही म्हणत’ असं सुप्रिया सुळे म्हणाल्या.

‘सहा मंत्र्यांपैकी एक राम शिंदे आहेत. प्रत्येक आईला माहित असतं आपला मुलगा पास होणार की नापास. राम शिंदे यांची आई म्हणजे भाजप. जर भाजपच म्हणत असेल, की माझा मुलगा नापास होणार, तर काय बोलायचं?’ असं सुप्रिया सुळे (Supriya Sule on Ram Shinde) म्हणतात हास्याची लकेर उमटली.

‘रोहित पवार, तुम्ही आरामात बसा. दोन-चार दिवस काही प्रचार-बिचार नाही केला तरी चालेल. तुम्ही निवडून येतातच आहात. असं मी नाही, भाजप म्हणत आहे.’ असंही सुप्रिया सुळे म्हणाल्या.

सुप्रिया सुळेंची दोन वेळा साथ सोडणाऱ्या मतदारसंघात राष्ट्रवादीचा ‘सरप्राईज’ उमेदवार?

अहमदनगरला कर्जत जामखेड मतदारसंघातील रोहित पवार यांच्या प्रचारसभेत त्या बोलत होत्या. या सभेसाठी सुप्रिया सुळे यांच्यासह अजित पवार यांचे चिरंजीव पार्थ पवार, रुपाली चाकणकर, सक्षणा सलगर यांनी उपस्थिती लावली. कर्जत शहरातील बाजार तळावर झालेल्या या सभेला मोठ्या संख्येनं महिलांनी हजेरी लावली होती.

कर्जत जामखेड मतदारसंघात भाजपचे जलसंधारण मंत्री राम शिंदे यांच्याविरोधात शरद पवार यांचे नातू रोहित राजेंद्र पवार यांनी शड्डू ठोकला आहे.