उज्जवल निकम केंद्रीय मंत्रिमंडळात? अमित शहांच्या भेटीने चर्चांना उधाण, दिल्लीत मोठ्या घडामोडी

राजकारणातून मोठी बातमी समोर आली आहे. गेल्या काही काळापासून केंद्रीय मंत्रिमंडळाचा विस्तार होणार असल्याची चर्चा रंगली आहे. अशातच आता भाजपचे राज्यसभा खासदार उज्जवल निकम यांनी केंद्रीय गृहमंत्री अमित शाह यांची भेट घेतली आहे. त्यामुळे आता त्यांना केंद्रीय मंत्रिमंडळात स्थान मिळणार असल्याचीही चर्चा रंगू लागली आहे. याबाबत सविस्तर माहिती जाणून घेऊयात.

उज्ज्वल निकम अमित शहांच्या भेटीला

उज्जवल निकम यांनी अमित शाह यांची भेट घेतली आहे. केंद्रीय मंत्रिमंडळ विस्ताराची चर्चा सुरू असताना या भेटीला खास महत्त्व प्राप्त झाले आहे. त्यांना आता केंद्रात मोठी जबाबदारी मिळण्याची शक्यता आहे. मात्र याबाबत अद्याप घोषणा झालेली नाही. सूत्रांच्या माहितीनुसार, संसदेचे अधिवेशन संपल्यानंतर मंत्रिमंडळ विस्तार होण्याची शक्यता आहे. या विस्ताराआधी झालेल्या या भेटीमुळे राजकीय वर्तुळात चर्चांना उधाण आले आहे.

निकम यांच्याबाबत मुंबईतून चांगला अहवाल

सूत्रांच्या माहितीनुसार, उज्जवल निकम आणि अमित शाह यांच्या भेटीचा फोटो समोर आला आहे. ज्येष्ठ वकील असलेले निकम हे भाजपचे राज्यसभेचे खासदार आहेत. त्यांच्याबाबत मुंबईहूनही चांगला अहवाल दिल्लीला पोहोचला आहे. त्यामुळे त्यांचे प्रमोशन होऊन त्यांच्यावर महत्त्वाच्या खात्याची जबाबदारी सोपवली जाण्याची शक्यता आहे. त्यामुळे आता देशाचे लक्ष मंत्रिमंडळ विस्ताराकडे लागले आहे.

#NewTeam: अमित शाह के साथ इस तस्वीर में कौन हैं ? इनकी मुलाकात हो चुकी है । अमित शाह के बाद इन्हें एक और पावरफुल मंत्री से मिलने भेजा गया । इनके बारे में मुंबई से भी अच्छी रिपोर्ट दिल्ली आई है । प्रमोशन में इन्हें ‘बड़ा आदमी’ बनाया जाएगा pic.twitter.com/Wj5WtCq4iY

— Piyush Padmakar (@PiyushPadmakar) August 11, 2026

कोण आहेत उज्ज्वल निकम?

उज्ज्वल निकम हे प्रसिद्ध विशेष सरकारी वकील आहेत. हत्या, दहशतवाद आणि इतर गाजलेल्या फौजदारी खटल्यांमध्ये त्यांनी सरकारची बाजू मांडली आहे. 2025 मध्ये त्यांची राष्ट्रपतींकडून राज्यसभेवर नामनिर्देशित सदस्य म्हणून नियुक्ती झाली. त्यांना 2016 मध्ये पद्मश्री पुरस्कारही मिळाला आहे. आता त्यांना केंद्रात मंत्रिपद मिळण्याची शक्यता वर्तवली जात आहे.

उज्ज्वल निकम यांच्या गाजलेल्या केसेस

• 1993 मुंबई बॉम्बस्फोट प्रकरण : निकम यांची या खटल्यासाठी सरकारी वकील म्हणून नियुक्ती झाली होती. या प्रकरणात निकम यांनी सरकारची बाजू मांडली. त्यांच्या कारकिर्दीला मोठी राष्ट्रीय ओळख मिळवून देणाऱ्या प्रकरणांपैकी हे एक होते.
• 26/11 मुंबई दहशतवादी हल्ला : हा त्यांच्या कारकिर्दीतील सर्वात प्रसिद्ध खटला मानला जातो. 26/11 हल्ल्यात जिवंत पकडला गेलेला दहशतवादी अजमल कसाब याच्याविरुद्धच्या खटल्यात निकम विशेष सरकारी वकील होते. त्यांनी कसाबविरोधात सरकारची बाजू मांडली आणि न्यायालयाने त्याला फाशीची शिक्षा सुनावली.
• गुलशन कुमार हत्या प्रकरण : टी-सीरीजचे संस्थापक आणि चित्रपट निर्माते गुलशन कुमार यांची मुंबईत हत्या झाली होती. या हत्येच्या खटल्यात निकम सरकारी वकील होते. मात्र या प्रकरणात अनेक आरोपी निर्दोष सुटले आणि अखेरीस एका आरोपीची दोषसिद्धी झाली.
• प्रमोद महाजन हत्या प्रकरण : भाजपचे ज्येष्ठ नेते प्रमोद महाजन यांची त्यांचे भाऊ प्रवीण महाजन यांनी गोळी झाडून हत्या केली होती. या गाजलेल्या खटल्यातही निकम यांनी सरकारची बाजू मांडली.
• कोपर्डी बलात्कार व हत्या प्रकरण : कोपर्डी प्रकरणातही ते विशेष सरकारी वकील होते. या प्रकरणातील आरोपींना कठोर शिक्षा मिळावी यासाठी त्यांनी सरकारची बाजू मांडली.