कोण आहेत देशाच्या पहिल्या ट्रान्सजेंडर आमदार शबनम मौसी? निवडणुकीपूर्वी या कारणामुळे अडचणीत

मध्य प्रदेश : 23 नोव्हेंबर 2023 | देशात जेव्हा निवडणुकीचा हंगाम येतो, तेव्हा बरेच इतिहास रचले जातात. 23 वर्षांपूर्वी म्हणजेच 2000 मध्ये पोटनिवडणुकीत असाच इतिहास रचला गेला होता. देशातील पहिल्या ट्रान्सजेंडर आमदाराला निवडून दिलं होतं. त्यांचं नाव होतं शबनम बानो उर्फ शबनम मौसी. आता 23 वर्षांनंतर त्याच शबनम मौसी पुन्हा एकदा चर्चेत आल्या आहेत. मात्र यावेळी त्या एका चांगल्या कारणासाठी नव्हे तर त्यांच्याविरोधात दाखल झालेल्या एफआयआरमुळे चर्चेत आहेत. मध्यप्रदेशच्या शहडोलमधील सोहागपूर इथल्या माजी आणि पहिल्या किन्नर विधायक शबनम मौसी नेहमीच त्यांच्या कारनाम्यांमुळे चर्चेचा विषय ठरतात. यावेळीही त्या आचारसंहितेचा भंग केल्यामुळे चर्चेत आल्या आहेत. एमपीच्या अनुपपूर जिल्ह्यात पोलिसांकडे पिस्तूल जमा न केल्याच्या आरोपामुळे शबनम यांच्याविरोधात आचारसंहितेचा भंग केल्याचा गुन्हा दाखल करण्यात आला आहे.

कोण आहेत शबनम मौसी?

देशातील पहिल्या किन्नर आमदार शबनम मौसी यांनी 2000 मध्ये शहडोल जिल्ह्यातील सोहागपूर मतदारसंघातून पोटनिवडणूक जिंकली होती. तत्कालीन काँग्रेस आमदार कृष्णपाल सिंह यांच्या निधनानंतर ती जागा रिक्त झाली होती. त्यांनी भाजपच्या लल्लू सिंह यांचा 17,800 हून जास्त मतांनी पराभव केला. मात्र 2003 च्या विधानसभा निवडणुकीत त्यांना केवळ 1400 मते मिळाली आणि त्यांचा पराभव झाला. शबनम यांनी एका ऑटो ड्रायव्हरला मारहाण केल्यामुळेही चर्चेत आल्या होत्या.

नेमकं काय आहे प्रकरण?

पोलिसांनी दिलेल्या माहितीनुसार, शबनम यांना पिस्तूल जमा करण्यासाठी नोटीस बजावण्यात आली होती. परंतु तरीही त्यांनी ती जमा केली नाही. आदेशाचं उल्लंघन केल्याप्रकरणी कलम 188 अंतर्गत त्यांच्यावर गुन्हा दाखल करण्यात आला आहे. मिळालेल्या माहितीनुसार, शबनम यांच्याकडे दोन बंदुका होत्या. त्यापैकी एक त्यांनी जमा केली होती आणि दुसरी जमा केली नाही. यामुळे प्रशासनाने त्यांच्या पिस्तुलाचा परवानाच रद्द केला आहे.

निवडणुकीत किन्नर

1994 मध्ये भारतात किन्नरांना मतदानाचा अधिका मिळाला. अपक्ष उमेदवार म्हणून निवडणूक लढवणाऱ्या शबनम मौसी या देशातील पहिल्या किन्नर आमदार होत्या. तर पहिल्या किन्नर महापौरसुद्धा मध्यप्रदेशच्या कमला जान होत्या. 2018 मध्ये मध्यप्रदेशातील अंबा मतदारसंघातून पाच किन्नरांनी निवडणूक लढवून भाजप, काँग्रेस आणि बसपा या राष्ट्रीय पक्षांना थेट आव्हान दिलं होतं. 2018 मध्ये नेहा किन्नरने अपक्ष उमेदवार म्हणून निवडणूक लढवली होती. 23.85 टक्के मतं मिळवून त्या दुसऱ्या क्रमांकावर आल्या होत्या. यंदाच्या निवडणुकीत आम आदमी पक्षाकडून चंदा किन्नर यांनाही तिकिट देण्यात आलं आहे.