एक दोन तीन चार..सात..! टी20 क्रिकेटमध्ये बांगलादेशच्या खेळाडूने घेतल्या धडाधड विकेट Video

बांग्लादेश प्रीमियर लीग स्पर्धेतील पाचव्या सामन्यात धडाधड विकेटची अनुभूती क्रीडारसिकांना घेता आली. बांग्लादेश प्रीमियर लीग स्पर्धेचा सामना दरबार राजशाही आणि ढाका कॅपिटल्स यांच्यात रंगला होता. या सामन्यात ढाका कॅपिटल्सने नाणेफेक जिंकून फलंदाजीचा निर्णय घेतला आहे. पण हा निर्णय फसल्याचं दिसलं. तस्किन अहमदच्या गोलंदाजीमुळे धावांची गती मंदवली. सुरुवातीला लिटन दास आणि तन्झिद हसन यांच्या विकेट घेतल्या. त्यानंतर मधल्या फळीत स्टी एस्किनाझी आणि शहादत दिपू यांनी डाव सावरला आणि तिसऱ्या विकेटसाठी 79 धावांची भागीदारी केली. ही जोडी फोडण्यात तस्किन अहमदला यश आलं. त्यानंतर त्याने डेथ ओव्हरमध्ये कहर केला. उरलेल्या दोन षटकात चार विकेट घेत इतिहास रचला. तस्किन अहमदने 4 षटकात 19 धावा देत 7 गडी बाद केले. त्यामुळे ढाका कॅपिटल्सला फक्त 174 धावांपर्यंत मजल मारता आली. या धावांचा पाठलाग करताना दरबार राजशाही संघाने 3 विकेट गमवल्या आणि 18.1 षटकात आव्हान पूर्ण केलं.

बांग्लादेश प्रीमियर लीग इतिहासात पहिल्यांदाच 7 विकेट घेण्याची किमया साधली गेली आहे. यापूर्वी 17 धावा देत 6 गडी टीपून मोहम्मद अमिरने हा विक्रम नोंदवला होता. इतकंच काय तर लीग स्पर्धेत अशी कामगिरी करणार तस्किन हा पहिला गोलंदाज ठरला आहे. तर टी20 क्रिकेटमध्ये अशी कामगिरी करणारा तिसरा गोलंदाज ठरला आहे. टी20 क्रिकेटमध्ये सर्वोत्तम गोलंदाजीचा विक्रम मलेशियाच्या सियाझरुल इद्रासच्या नावावर आहे. त्याने 2023 मध्ये चीनविरुद्ध 8 धावांत 7 बळी घेतले होते. तर या यादीत कॉलिन अकरमनचे नाव दुसऱ्या क्रमांकावर आहे. लीसेस्टरशायरकडून खेळताना ॲकरमनने 2019 मध्ये बर्मिंगहॅम बिअर्सविरुद्ध 18 धावांत 7 बळी घेतले होते.

View this post on Instagram

A post shared by FanCode (@fancode)

दोन्ही संघांचे खेळाडू

ढाका कॅपिटल्स (प्लेइंग इलेव्हन): लिटन दास (विकेटकीपर), तनजीद हसन, शहादत हुसेन दिपू, स्टीफन एस्किनाझी, थिसारा परेरा (कर्णधार), शुभम रांजणे, अलाउद्दीन बाबू, चतुरंगा डी सिल्वा, मुकिदुल इस्लाम, नजमुल इस्लाम, मुस्तफिजुर रहमान

दरबार राजाशाही (प्लेइंग इलेव्हन): मोहम्मद हरीस, जिशान आलम, अनामूल हक (कर्णधार), यासिर अली, रायन बर्ल, अकबर अली (विकेटकीपर), सब्बीर हुसैन, हसन मुराद, मोहोर शेख, शफीउल इस्लाम, तस्किन अहमद