ENG vs PAK: टी20 वर्ल्डकप स्पर्धेपूर्वी पाकिस्तानची हाराकिरी, इंग्लंडकडून व्हाईट वॉश

टी20 वर्ल्डकप स्पर्धेचं जेतेपद मिळावं यासाठी पाकिस्तानने काय काय केलं. खेळाडूंना आर्मी ट्रेनिंग दिली. कर्णधार बदलला आणि बाबर आझमकडे नेतृत्व दिलं. पण पाकिस्तान संघात काहीच फरक पडलेला नाही. वर्ल्डकप स्पर्धेपूर्वी पाकिस्तानने आयर्लंड आणि इंग्लंड दौरा कूरन तयारीचा आढावा घेण्याचा प्रयत्न केला. पण त्यात पाकिस्तानची कमकुवत बाजू उघड झाली. आयर्लंडने मालिकेतील पहिल्याच सामन्यात पाकिस्तानला पराभूत केलं होतं. त्यानंतर उर्वरित दोन सामन्यात पाकिस्तान कशीबशी झुंज दिली आणि मालिका जिंकली. पण पाकिस्तानला इंग्लंड विरुद्धच्या मालिकेत पराभवाची चव चाखावी लागली आहे. इंग्लंडने 4 सामन्यांच्या टी20 मालिकेत पाकिस्तानचा 2-0 ने पराभव केला. इंग्लंडने या मालिकेत पाकिस्तानला व्हाईट वॉश दिला आहे. दोन सामने पावसामुळे झाले नाहीत आणि दोन सामन्यात इंग्लंडने विजय मिळवला. त्यामुळे पाकिस्तानी संघाचं पितळ टी20 वर्ल्डकप स्पर्धेपूर्वीच उघड पडलं आहे. लंडनमध्ये झालेल्या शेवटच्या टी20 सामन्यात इंग्लंडने पाकिस्तानला पराभवाचं पाणी पाजलं.

मालिकेतील चौथ्या आणि शेवटच्या सामन्यात इंग्लंडने नाणेफेकीचा कौल जिंकला आणि प्रथम गोलंदाजी स्वीकारली. पाकिस्तानने 19.5 षटकात सर्व गडी बाद 157 धावा केल्या आणि विजयासाठी 158 धावांचं आव्हान दिलं. इंग्लंडने हे आव्हान 15.3 षटकात पूर्ण केलं. इंग्लंडने 7 गडी आणि 27 चेंडू राखून पाकिस्तानला पराभूत केलं. त्यामुळे पाकिस्तानचा संघ फलंदाजी आणि गोलंदाजी या दोन्ही ठिकाणी कमकुवत असल्याचं अधोरेखित झालं आहे. त्यामुळे भारत 9 जूनला होणाऱ्या सामन्यात वरचढ ठरू शकतो. पाकिस्तानची कमकुवत बाजूचा अभ्यास करून साखळी फेरीत धोबीपछाड देता येईल. पाकिस्तानचा संघ वर्ल्डकपमध्ये 6 जूनला अमेरिकेविरुद्ध पहिला सामना खेळणार आहे.

दोन्ही संघांची प्लेइंग 11

पाकिस्तान (प्लेइंग इलेव्हन): बाबर आझम (कर्णधार), मोहम्मद रिझवान, उस्मान खान, फखर जमान, शादाब खान, आझम खान (विकेटकीपर), इफ्तिखार अहमद, शाहीन आफ्रिदी, नसीम शाह, हरिस रौफ, मोहम्मद अमीर.

इंग्लंड (प्लेइंग इलेव्हन): जोस बटलर (विकेटकीपर/कर्णधार), फिलिप सॉल्ट, विल जॅक्स, जॉनी बेअरस्टो, हॅरी ब्रूक, मोईन अली, लियाम लिव्हिंगस्टोन, ख्रिस जॉर्डन, जोफ्रा आर्चर, आदिल रशीद, मार्क वुड.