IND vs AFG : तिसऱ्या सामन्यात अफगाणिस्तानच्या मनासारखं झालं, कर्णधार इब्राहिम झद्रानने सांगितलं की…

मुंबई : भारत अफगाणिस्तान यांच्यात तिसरा टी20 सामना सुरु झाला आहे. हा सामना जिंकून भारताचा व्हाईट वॉश देण्याचा प्रयत्न आहे. तर अफगाणिस्तानला काहीही करून हा सामना जिंकून लाज राखायची आहे. पहिल्या दोन सामन्यात अफगाणिस्तानच्या मनासारखं काहीच झालं नाही. नाणेफेकीचा कौलही टीम इंडियाच्या बाजूने लागला होता. पण तिसऱ्या सामन्यात नाणेफेकीचा कौल तर टीम इंडियाच्या बाजूने लागला. पण अफगाणिस्तानला हवं तसंच झालं. कारण नाणेफेकीचा कौल जिंकल्यानंतर रोहित शर्माने फलंदाजीचा निर्णय घेतला. त्यामुळे कर्णधार इब्राहिम झद्रान याचा जीव भांड्यात पडला. रोहित शर्मा काय निर्णय घेतो याकडे त्याचं लक्ष लागून होतं. रोहित शर्माने फलंदाजी घेताच त्याच्या चेहरा फुलला. सामना सुरु होण्यापूर्वी झद्रानने याबाबत आपलं मत मांडलं. तसेच तीन बदल केल्याचं सांगितलं.

“आम्हाला प्रथम गोलंदाजी करायची होती. आम्ही या मालिकेतून काही सकारात्मक गोष्टी घेतल्या आहेत. आम्ही आज आणखी काही प्रयत्न करु. आजच्या सामन्यात आम्ही तीन बदलही केले आहेत”, असं अफगाणिस्तानचा कर्णधार इब्राहिम झद्रान याने सांगितलं. तर नाणेफेकीचा कौल जिंकल्यानंतर रोहित शर्माने फलंदाजी घेण्याचं कारण स्पष्ट केलं होतं. “आम्ही प्रथम फलंदाजी करू. आम्ही पहिल्या दोन सामन्यांमध्ये गोलंदाजी केली होती. त्यामुळे आम्ही आज फलंदाजीचा निर्णय घेतला. त्याचा विकेटशी काहीही संबंध नाही. फक्त काही कॉम्बिनेशन करून बघायचे आहेत आणि काही संधी द्यायला हव्यात. आम्ही तीन बदल केले असून संजू, आवेश आणि कुलदीप यांना संधी दिली आहे.”, असं रोहित शर्माने सांगितलं.

दोन्ही संघांची प्लेइंग इलेव्हन

अफगाणिस्तान (प्लेइंग इलेव्हन): रहमानउल्ला गुरबाज (विकेटकीपर), इब्राहिम झद्रान (कर्णधार), गुलबदिन नायब, अजमतुल्ला ओमरझाई, मोहम्मद नबी, नजीबुल्ला झदरन, करीम जनात, शराफुद्दीन अश्रफ, कैस अहमद, मोहम्मद सलीम साफी, फरीद अहमद मलिक

भारत (प्लेइंग इलेव्हन): यशस्वी जयस्वाल, रोहित शर्मा (कर्णधार), विराट कोहली, शिवम दुबे, संजू सॅमसन (विकेटकीपर), रिंकू सिंग, वॉशिंग्टन सुंदर, रवी बिश्नोई, मुकेश कुमार, कुलदीप यादव, आवेश खान