“…गर्लफ्रेंडला आणू का?”, गौतम गंभीर आणि सुनील नरीन यांच्यात असा झाला पहिला संवाद

आयपीएल स्पर्धेत कोलकाता नाईट रायडर्सने अपेक्षेप्रमाणे यश मिळवलं आहे. पहिल्या सामन्यापासून कोलकात्याचा चढता आलेख कायम राहिला. साखळी फेरीत संघ टॉपला राहिला आणि क्वॉलिफायर 1 जिंकून अंतिम फेरी गाठली. अंतिम फेरीत सनरायझर्स हैदराबादला कुठेच विजयाची संधी दिली नाही आणि सहज विजय मिळवला. कोलकात्याला जेतेपद मिळाल्यानंतर गौतम गंभीरने आपल्या कर्णधारपदाच्या कार्यकाळातील एक किस्सा उघड केला आहे. कोलकाता नाईट रायडर्सचं नेतृत्व 2011-12 मध्ये गौतम गंभीरकडे होतं. तेव्हा सुनील नरीन संघात नवखा होता. खूपच कमी बोलायचा असं गंभीरने सांगितलं. गौतम गंभीरने एका मुलाखतीत सुनील नरीनसोबतच्या मैत्रीचा उलगडा केला. इतकंच काय तर या दोघही एकमेकांना भावाप्रमाणे मानतात. कोलकात्याने 2012 आणि 2014 मध्ये जेतेपद मिळवलं होतं तेव्हा सुनील नरीनने चमकदार कामगिरी केली होती. गौतम गंभीरने स्पोर्टकीडाला दिलेल्या मुलाखतीत सांगितलं की, “मी आणि सुनील नरीन जवळपास एकाच स्वभावाचे आहोत. आमच्या भावना एक सारख्याच आहेत.”

“मला आजही आठवते की, नरीन 2012 मध्ये पहिल्यांदा आयपीएल खेळण्यासाठी आला होता. तेव्हा आम्ही जयपूरमध्ये सराव करण्यासाठी जाणार होतो. तेव्हा मी त्याला दुपारच्या जेवणासाठी बोलवलं. तो इतका लाजरा होता की त्याने या दरम्यान एकही शब्द बोलला नाही. पण हिमत करून जेव्हा त्याने पहिला प्रश्न विचारला तो म्हणजे मी माझ्या गर्लफ्रेंडला आयपीएल पाहण्यासाठी आणू शकतो का?”

“नरीन पहिल्या पर्वात खूपच शांत होता. पण आता आम्ही कोणत्याही विषयावर चर्चा करू शकतो. तो मला भावासारखा आहे. मी त्याला मित्र मानतच नाही. त्याला भाऊ म्हणूनच गृहीत धरतो. जेव्हा मला त्याची गरज असते किंवा त्याला असते तेव्हा आम्ही एक कॉलच्या अंतरावर असतो. आम्ही या पद्धतीचं नातं तयार केलं आहे. आम्ही जास्त उत्साहित होत नाही. भावनांचं प्रदर्शन करत नाहीत. आम्ही दिखाऊबाज नाहीत. आम्ही फक्त काम करतो आणि परत येतो.”, असं गौतम गंभीर पुढे म्हणाला.