T20 World Cup 2026 स्पर्धेत न्यूझीलंडचा युएईवर विक्रमी विजय, एलन आणि सेफर्टचं शतक!
टी20 वर्ल्डकप स्पर्धेच्या 11व्या सामन्यात न्यूझीलंड आणि युएई हे संघ आमनेसामने आले होते. या सामन्यात न्यूझीलंडने युएईचा 10 विकेटने धुव्वा उडवला. या विजयासह काही विक्रम आपल्या नावावर केले आहे.
टी20 वर्ल्डकप स्पर्धेत न्यूझीलंड आणि युएई यांच्यात आमनासामना झाला. या सामन्यात नाणेफेकीचा कौल युएईच्या बाजूने लागला. पण सामन्यावर पकड न्यूजीलंडने मिळवली. युएईने प्रथम फलंदाजी करताना 20 षटकात 6 गडी गमवून 173 धावा केल्या. तसेच विजयासाठी 174 धावांचं आव्हान ठेवलं. हे आव्हान न्यूझीलंडने एकही गडी न गमावता पूर्ण केलं. न्यूझीलंडच्या फिन एलेन आणि टिम सेफर्ट जोडीने युएईच्या गोलंदाजांना झोडून काढलं. पावर प्लेमध्ये या जोडीने 78 धावांची भागीदारी केली. त्यानंतर दोघांनी अर्धशतक पूर्ण केलं. त्यानंतरही या जोडीने आक्रमक खेळी सुरूच ठेवली. या जोडीने विकेट गमावली नाही आणि विजय मिळवून दिला. टिम सेफर्टने नाबाद 89 धावांची खेळी केली. यात त्याने 12 चौकार आणि 3 षटकार मारले. तर फिन एलनने 50 चेंडूत नाबाद 84 धावा केल्या. यात 5 चौकार आणि 5 षटकार मारले. न्यूझीलंडने अफगाणिस्तानंतर युएईला पराभूत केलं. टी20 वर्ल्डकप स्पर्धेच्या इतिहासात न्यूझीलंडने काही विक्रमांची नोंद केली आहे.
टी20 वर्ल्डकप स्पर्धेच्या इतिहासातील ही सर्वोच्च भागीदारी ठरली आहे. आतापर्यंत कोणत्याही विकेटसाठी इतकी मोठी भागीदारी झालेली नाही. फिन एलन आणि टिम सेफर्ट यांनी नाबाद 175 धावांची भागीदारी केली.
फिन एलन आणि टिम सेफर्ट या जोडीने टी20 वर्ल्डकप 2022 स्पर्धेच्या उपांत्य फेरीत भारताविरुद्ध इंग्लंडच्या एलेक्स हेल्स आणि जोस बटलर यांनी केलेल्या 170 धावांच्या भागीदारीचा विक्रम मोडला.
टी20 क्रिकेटमध्ये एकही विकेट न गमवता 150 हून अधिक धावांचा पाठलाग करणारा न्यूझीलंड हा दुसरा संघ ठरला आहे. यात पाकिस्तानचा संघ अव्वल स्थानी असून त्यांनी इंग्लंडविरुद्ध 2022 मध्ये कराचीत 200 धावांचा पाठलाग विकेट न गमवता केला होता.
टी20 वर्ल्डकप 2007 पासून 10 विकेट राखून विजय मिळवण्याची ही सातवी वेळ आहे.2007 मध्ये ऑस्ट्रेलियाने श्रीलंकेविरुद्ध, 2012 मध्ये दक्षिण अफ्रिकेने झिम्बाब्वेविरुद्ध, 2021 मध्ये ओमानने पीएनजीविरुद्ध, 2021 मध्ये पाकिस्तानने भारताविरुद्ध, 2022 मध्ये इंग्लंडने भारताविरुद्ध, 2024 मध्ये इंग्लंडने युएसएविरुद्ध आणि आता न्यूझीलंडने युएईविरुद्ध विजय मिळवला आहे.
फिन एलनने नाबाद 84 आणि टिम सेफर्टने नाबाद 89 धावांची खेळी केली. पण तरीही या दोघांच्या नावावर शतक नोंदवलं गेलं आहे. टी20 क्रिकेटमध्ये या दोघांनी षटकारांचं शतक पूर्ण केलं.
न्यूझीलंडच्या सलामीवीरांनी जोरदार फटकेबाजी करत पावरप्लेमध्ये 78 धावा केल्या. सेफर्टने 23 चेंडूत अर्धशतक पूर्ण केले तर त्याचा जोडीदार फिन एलनने 27 चेंडूत तोच टप्पा गाठला.
150हून अधिक धावाचा पाठलाग करताना 28 चेंडू शिल्लक ठेवण्याचा टी20 वर्ल्डकपमधील तिसरा विक्रम आहे. टी20 वर्ल्डकप 2024 स्पर्धेतील स्कॉटलँड ओमान सामन्यात 41 चेंडू शिल्लक, तर 2014 टी20 वर्ल्डकप स्पर्धेत नेदरलँड आयर्लंड सामन्यात 37 चेंडू शिल्लक राहिले होते.
