Asian Games 2026 : नवख्या थायलंडने पाकिस्ताला रडवले! शेवटच्या षटकात 2 चेंडू राखून कसाबसा विजय

एशियन गेम्स 2026 स्पर्धेत महिला क्रिकेटच्या दुसऱ्या उपांत्यपूर्व सामन्यात एक मोठा उलटफेर होता होता टळला. दोन वेळच्या माजी सुवर्णपदक विजेत्या पाकिस्तान महिला क्रिकेट संघाला नवख्या आणि दुबळ्या मानल्या जाणाऱ्या थायलंडविरुद्ध विजयासाठी नाकीनऊ आले होते. या सामन्यात पाकिस्तानने 2 चेंडू शिल्लक ठेवून थायलंडवर 3 गडी राखून कसाबसा थरारक विजय मिळवला. या विजयासह पाकिस्तानने उपांत्य फेरीत प्रवेश केला आहे. पाऊस आणि ओल्या मैदानामुळे या सामन्यात षटकांची कपात करण्यात आली आणि सामना प्रत्येकी 11 षटकांचा खेळवण्याचा निर्णय घेण्यात आला. पाकिस्तानची कर्णधार फातिमा सना हिने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजी करताना थायलंडच्या महिला संघाने 11 षटकांत 4 बाद 91 धावांचा अनपेक्षित आणि आव्हानात्मक धावसंख्या उभारली आणि पाकिस्तानसमोर 11 षटकांत 92 धावांचे कठीण लक्ष्य ठेवले.

विजयी धावांचा पाठलाग करताना पाकिस्तानची सुरुवात खराब झाली. मात्र, सलामीवीर शवाल झुल्फिकारने 14 चेंडूंत 25 धावांची महत्त्वपूर्ण खेळी खेळली. त्यानंतर मधल्या फळीत कर्णधार फातिमा सानाने 13 चेंडूंत 21 धावांचे योगदान देत संघाचा डाव सावरला. या दोन फलंदाजांच्या खेळीमुळे पाकिस्तानला सामन्यात टिकून राहता आले. थायलंडच्या फिरकीपटूंनी अचूक आणि नियंत्रित गोलंदाजी करत सामना शेवटच्या षटकापर्यंत खेचला. अंतिम षटकात पाकिस्तानला विजयासाठी अवघ्या ४ धावांची गरज होती, मात्र खेळपट्टीवर प्रचंड दडपण होते. थायलंडच्या गोलंदाजांनी कडवी झुंज दिली,

चार धावांची गरज असताना पहिल्या चेंडूवर इमान नसीरने एक धाव घेत स्ट्राईक उम्म-ए-हानीला दिली. त्यानंतर दुसऱ्या चेंडूवर उम्म-ए-हानीने हुशारीने एक धाव चोरली. तिसऱ्या चेंडूवर पुन्हा इमान नसीरने एक धाव घेत धावसंख्या बरोबरीत आणली आणि अखेर चौथ्या चेंडूवर उम्म-ए-हानीने विजयी धाव घेत पाकिस्तानचा 3 गडी राखून थरारक विजय निश्चित केला.

या थरारक विजयासह पाकिस्तान महिला क्रिकेट संघाने एशियन गेम्स स्पर्धेच्या महिला क्रिकेट प्रकारात उपांत्य फेरीत पोहोचणारा पहिला संघ बनण्याचा बहुमान मिळवला आहे. जरी पाकिस्तानने सामना जिंकला असला, तरी थायलंडच्या महिला संघाने आपल्या अप्रतिम खेळोने क्रिकेट चाहत्यांची मने जिंकली आहेत.