IPL 2026: रोहित शर्मा किंवा एमएस धोनी नाही तर हा आहे आयपीएलचा बेस्ट कर्णधार, आकडेवारी वाचा
आयपीएल 2026 स्पर्धेचं बिगुल वाजल्यानंतर आकडेवारींचा खेळ सुरू झाला आहे. आकडेमोड करत कोण बेस्ट आणि कोण कुठे आहे याचा अंदाज घेतला आहे. इतकंच काय तर आयपीएलचा बेस्ट कर्णधार कोण यावरूनही चर्चांना उधाण आलं आहे. रोहित शर्मा आणि धोनीच्या नाव आघाडीवर आहे. पण आकडे काही वेगळंच सांगतात.
आयपीएलचं 19वं पर्व 28 मार्चपासून सुरू होत आहे. आतापर्यंत पार पडलेल्या 18 पर्वात काही फ्रेंचायझींचा दबदबा दिसून आला आहे. यात मुंबई इंडियन्स आणि चेन्नई सुपर किंग्स पाच जेतेपदांसह आघाडीवर आहेत. तर कोलकाता नाईट रायडर्सने तीन जेतेपद पटकावले आहे. अशा स्थितीत आयपीएलचा बेस्ट कर्णधार कोण याची चर्चा रंगणार हे सहाजिकच आहे. मुंबई इंडियन्स आणि चेन्नई सुपर किंग्स फ्रेंचायझीने 5-5 वेळा जेतेपद मिळवलं आहे. त्यामुळे या फ्रेंचायझीचे कर्णधार बेस्ट आहेत असं सांगितलं जातं. पण जेव्हा विजयी टक्केवारींची गोष्ट तेव्हा मात्र हे दोन्ही दिग्गज कर्णधार मागे पडतात. त्यामुळे आता तुम्हाला प्रश्न पडला असेल की, मग बेस्ट कर्णधार कोण? तर या यादीत पंजाब किंग्सचा कर्णधार श्रेयस अय्यर आघाडीवर येतो. आयपीएलमध्ये सर्वाधिक चांगली विजयी टक्केवारी श्रेयस अय्यरच्या नावावर आहे. कोलकाता नाईट रायडर्ससह जेतेपद मिळवणाऱ्या श्रेयस अय्यरने तीन संघांचं कर्णधारपद भूषवलं आहे. तसेच अंतिम फेरीत पोहोचवलं आहे.
आयपीएल स्पर्धेत सामन्यात कर्णधार भूषवणाऱ्या श्रेयस अय्यरची विजयी टक्केवारी 58.82 टक्के आहे. अय्यरने आतापर्यंत 87 सामन्यात कर्णधारपद भूषवलं आहे. त्यात त्याच्या नेतृत्वात 50 विजय मिळवले आहेत. तर 35 सामन्यात पराभवाचं तोंड पाहावं लागलं आहे. तर दोन सामने अनिर्णित ठरले आहेत. दुसऱ्या स्थानावर मास्टर ब्लास्टर सचिन तेंडुलकर याचं नाव येतं. त्याची विजयी टक्केवारी अय्यर सारखीच 58.82 टक्के आहे. सचिनने 51 सामन्यात कर्णधारपद भूषवलं आहे. महेंद्रसिंह धोनी 58.36 विजयी टक्केवारीसह तिसऱ्या, शेन वॉर्न 56.36 विजयी टक्केवारीसह चौथ्या आणि रोहित शर्मा 56.32 विजयी टक्केवारीसह पाचव्या स्थानावर आहे.
पंजाब किंग्सला जेतेपद मिळवून देणार का?
आयपीएल 2025 स्पर्धेत पंजाब किंग्ससला उपविजेतेपदावर समाधान मानावं लागलं. पण यावेळी पंजाब किंग्स संघ पुन्हा एकदा जेतेपदाच्या शर्यतीत उतरणार आहे. पंजाबचा पहिला सामना 31 मार्चला गुजरात टायटन्सशी होणार आहे. त्यामुळे या स्पर्धेतील सुरुवात कशी होते याकडे लक्ष असेल. श्रेयस अय्यरच्या नेतृत्वात हा सामना जिंकला तर विजयी टक्केवारीत वाढ होत जाईल. आता या पर्वात पंजाब किंग्स किती सामने जिंकते यावरून विजयी टक्केवारीचं गणित ठरेल.
