SRH vs DC : हैदराबादची हॅट्रिक, ऑरेंज आर्मीकडून दिल्लीचा 47 धावांनी धुव्वा
Sunrisers Hyderabad vs Delhi Capitals Match Result, IPL 2026 : सनरायजर्स हैदराबादने सलग 2 सामने गमावल्यानंतर यशस्वीपणे विजयी घोडदौड कायम राखली आहे. हैदराबादने दिल्लीला पराभूत करुन विजयाची हॅट्रिक पूर्ण केली आहे.
सनरायजर्स हैदराबादने आयपीएल स्पर्धेच्या 19 व्या मोसमातील (IPL 2026) 31 व्या सामन्यात घरच्या मैदानात राजीव गांधी आंतरराष्ट्रीय क्रिकेट स्टेडियममध्ये दिल्ली कॅपिट्ल्सवर एकतर्फी विजय मिळवला आहे. हैदराबादने दिल्लीचा 47 धावांनी धुव्वा उडवला. ओपनर अभिषेक शर्मा याने केलेल्या नाबाद शतकी खेळीच्या जोरावर सनरायजर्स हैदराबादने दिल्लीसमोर 243 धावांचं आव्हान ठेवलं होतं. मात्र दिल्लीला हैदराबादच्या गोलंदाजांसमोर 20 ओव्हरमध्ये 9 विकेट्स गमावून 195 धावांपर्यंतच पोहचता आलं. हैदराबादने अशाप्रकारे एकूण चौथा आणि सलग तिसरा विजय मिळवला. अभिषेक शर्मा आणि इशान मलिंगा हे दोघे हैदराबादच्या विजयाचे शिल्पकार ठरले. अभिषेकने नाबाद 135 धावांची खेळी केली. तर एशान मलिंगा याने सर्वाधिक 4 विकेट्स घेत बॉलिंगने हैदराबादच्या विजयात प्रमुख भूमिका बजावली. तर दिल्लीचा हा एकूण तिसरा पराभव ठरला.
