सूर्यकुमार यादवचं कर्णधारपद धोक्यात! टीम इंडियातून आऊट होण्याची भीती? शेवटची संधी आणि…

आयपीएल 2026 स्पर्धा सुरू असून मुंबई इंडियन्सचा स्टार फलंदाज सूर्यकुमार यादवच्या फलंदाजीला काही चमक येताना दिसत नाही. गेल्या वर्षभरापासून त्याची कामगिरी सुमार राहिली आहे. टी20 वर्ल्डकप, मालिका असो की आयपीएल स्पर्धा सूर्यकुमारचा फॉर्म चिंतेचा विषय ठरला आहे. सूर्यकुमार यादवच्या नेतृत्वात भारताने आशिया कप आणि टी20 वर्ल्डकप 2026 स्पर्धेवर नाव कोरलं. पण त्याचा फॉर्ममुळे त्याचं कर्णधारपद आणि टीम इंडियातील जागा अडचणीत आली आहे. त्याचा ढासळता फॉर्म पाहता निवड समितीच्या रडारवर आला आहे. त्यामुळे त्याच्याऐवजी दुसरा पर्याय शोधला जात असल्याची चर्चा रंगली आहे. 2028 मध्ये लॉस एंजेलिसमध्ये ऑलिम्पिक स्पर्धा होणार आहे. या स्पर्धेत खेळण्याची इच्छा त्याने व्यक्त केली आहे. पण आता त्याला संघात सहभागी करणार की नाही यावर शंका आहे.

सूर्यकुमार यादवसाठी करो या मरोची लढाई

आयपीएल स्पर्धा संपल्यानंतर सूर्यकुमार यादवची खऱ्या अर्थाने कसोटी लागणार आहे. भारतीय संघ आयर्लंड आणि इंग्लंड दौऱ्यावर जाणार आहे. या दौऱ्यात त्याच्या फलंदाजी आणि कर्णधारपदाची पारख होईल. त्यानंतर 2028 ऑलिम्पिक स्पर्धेत खेळणार की नाही हे ठरवलं जाईल. वर्ल्डकप स्पर्धाच काय याच वर्षी टी20 वर्ल्डकप स्पर्धा होणार आहे. ही स्पर्धा ऑस्ट्रेलिया न्यूझीलंड येथे होणार आहे. त्यामुळे सूर्यकुमार यादवला मेहनत घ्यावी लागेल. विशेष म्हणजे सर्वकाही सूर्यकुमार यादवच्या विरोधात आहे. पण हेड कोच गंभीरने त्याच्यावरील विश्वास कायम ठेवला आहे. गंभीरचा कार्यकाळही 2028 पर्यंत वाढवला जाऊ शकतो. त्यामुळे सूर्यकुमार यादव संघात राहतो की नाही हे पाहणं औत्सुक्याचं ठरेल. दरम्यान, 2028 पर्यंत सूर्यकुमार यादव 38 वर्षांचा होईल.

सूर्यकुमार यादव फलंदाजी फेल गेला तर…

बीसीसीआयच्या सू्त्रांनी सांगितलं की, ‘अर्थातच, सूर्य सध्या संघाचे कर्णधारपद भूषवत आहे, पण त्याला फलंदाज म्हणूनही चांगली कामगिरी करणे आवश्यक आहे. तो इंग्लंड आणि आयर्लंडमध्ये नक्कीच कर्णधारपद भूषवेल, पण त्यानंतर 2028 पर्यंत त्याचे खेळणे त्याच्या कामगिरीवर अवलंबून असेल.’ त्यामुळे सूर्यकुमारचं भवितव्य पूर्णपणे या दोन दौऱ्यातील मालिकेवर अवलंबून असणार आहे. सूर्यकुमार यादव या मालिकेत फेल गेला तर शुबमन गिलचा विचार केला जाऊ शकतो.