T20I Ranking: इशान किशन टी20 क्रिकेटमध्ये जगातील नंबर 1 फलंदाज? असं कसं झालं? जाणून घ्या

आयसीसीने टी20 क्रिकेटमधील फलंदाजांची क्रमावारी जाहीर केली आहे. या यादीत डावखुरा फलंदाज इशान किशन नंबर 1 वर विराजमान झाला आहे. त्यामुळे अनेकांना आश्चर्याचा धक्का बसला आहे. कारण इशानने सलामीवीर अभिषेक शर्माला धोबीपछाड देत पहिलं स्थान गाठलं आहे. इशान किशनने कमबॅक केल्यापासून फलंदाजीत कमाल केली आहे, यात काही शंका नाही. टी20 वर्ल्डकप 2026 स्पर्धेत तर त्याची बॅट चांगलीच तळपली. आता टी20 फॉर्मेटमध्ये थेट पहिल्या स्थानी विराजमान झाला आहे. पण आयसीसी क्रमवारी पाहता अभिषेक शर्मावर अन्याय झाल्याचं दिसत आहे. नेमकं असं का आणि कशासाठी? टी20 क्रमवारीत आश्चर्यकारक काय घडलं? ते जाणून घेऊयात

इशान किशनने अभिषेक शर्माला कसं मागे टाकलं?

आयसीसी टी20 क्रमवारीत अभिषेक शर्माची पहिल्या स्थानावरून घसरण झाली आहे. पण मागच्या मालिकेत इशान किशनपेक्षा जास्त धावा करूनही क्रमांक घसरल्याने आश्चर्य व्यक्त होत आहे. आयर्लंडविरुद्धच्या मालिकेपूर्वी अभिषेक शर्मा 875 रेटिंग गुणांसह पहिल्या स्थानावर होता. तर इशान किशन त्याच्या मागोमात 871 रेटिंग गुणांसह दुसऱ्या स्थानावर होता. आयर्लंडविरुद्धच्या मालिकेतील पहिल्या सामन्यात अभिषेक शर्माने 20 चेंडूत 49 धावा केल्या. तर दुसऱ्या सामन्यात त्याला खातंही खोलता आलं नाही. दुसरीकडे, इशान किशनने पहिल्या टी20 सामन्यात 1 आणि दुसऱ्या टी20 सामन्यात फक्त 12 धावांचं योगदान दिलं. पण ताज्या क्रमवारीत इशानची रेटिंग 876, तर अभिषेकची रेटिंग 869 झाली आहे. धावा करूनही अभिषेक सोबत असं का घडलं? हा प्रश्न पडल्याशिवाय राहात नाही.

इशान किशन नंबर 1 का?

अभिषेक शर्माला दुसऱ्या टी20 सामन्यात शून्यावर बाद झाल्याचा फटका बसल्याचं दिसत आहे. इशान किशनने मागच्या 15 सामन्यात पहिलं स्थान गाठलं आहे. तीन वर्षांच्या विश्रांतीनंतर इशानने 21 जानेवारी 2026 रोजी टी20 आंतरराष्ट्रीय क्रिकेटमध्ये पुनरागमन केलं. इशानने 15 सामन्यात 36.33 च्या सरासरीने आणि 200 च्या स्ट्राईक रेटने 545 धावा केल्या आहेत. यात चार अर्धशतक आणि एका शतकाचा समावेश आहे. दुसरीकडे, अभिषेक शर्मा इशान किशनने पुनरागमन केल्यापासून सहा वेळा शून्यावर बाद झाला आहे. त्याचा फटका त्याला बसला आहे. त्यामुळे आयसीसी क्रमवारीत त्याला पहिलं स्थान गमवावं लागलं आहे.