आधी प्रतिस्पर्ध्यांना झुंजवलं, नंतर मैदानातच बाळाला स्तनपान
सामन्यात आक्रमक खेळी करत आपल्या संघाला जिंकवण्यासाठी जीवाचं रान करणाऱ्या ललवेंटुआंगी हिचं ममत्व अवघ्या काही मिनिटांमध्ये पाहायला मिळालं.
ऐझाल : बाळंतपणानंतर अवघ्या काही महिन्यांतच खेळाच्या मैदानात उतरलेल्या आईचं अनोखं रुप मिझोराममध्ये पाहायला मिळालं. महिलेने व्हॉलीबॉल सामन्याच्या हाफ टाईममध्ये बाळाला स्तनपान (Volleyball Player Breastfeed on ground) केलं. या प्रेरणादायी घटनेचे फोटो सोशल मीडियावर कौतुकास पात्र ठरत आहेत.
मिझोरामची राजधानी ऐझालमध्ये राज्यस्तरीय क्रीडा स्पर्धांचं आयोजन करण्यात आलं आहे. सोमवारी झालेल्या व्हॉलीबॉल सामन्यात ललवेंटुआंगी ही स्तनदा माता सहभागी झाली होती. सामन्यात आक्रमक खेळी करत आपल्या संघाला जिंकवण्यासाठी जीवाचं रान करणाऱ्या ललवेंटुआंगी हिचं ममत्व अवघ्या काही मिनिटांमध्ये पाहायला मिळालं.
ललवेंटुआंगीचं सात महिन्यांचं बाळ प्रेक्षकांमध्ये बसून एकप्रकारे आईला पाठिंबाच देत होतं. व्हॉलीबॉल सामन्याचा हाफ टाईम झाल्यावर आईने लेकराला काळजाशी कवटाळलं. त्यानंतर बाळाला मैदानातच स्तनपान केलं. मैदानात ही दुहेरी जबाबदारी सांभाळणाऱ्या खेळाडूवर नेटिझन्सकडून कौतुकाचा वर्षाव होत आहे.
Happened in Mizoram State Games 2019. Salute to the player! https://t.co/chahFY8W8P
— Aizawl Football Club (@AizawlFC) December 9, 2019
मिझोरामचे क्रीडामंत्री रॉबर्ट रोमाविया रोयते यांनी ललवेंटुआंगी हिला दहा हजार रुपयांची प्रोत्साहनपर रक्कम देण्याची घोषणा केली आहे. ऐझाल फुटबॉल क्लबनेही तिच्या ममत्वाला सलाम (Volleyball Player Breastfeed on ground) ठोकला आहे.