Apple : iPhone वर हे कसलं विघ्न? मग फॅक्टरीतील कामकाज का थांबवलं

नवी दिल्ली | 26 सप्टेंबर 2023 : दक्षिणेतील राज्य तामिळनाडूमध्ये पेगट्रॉन ही ॲप्पलच्या (Apple (AAPL.O) supplier Pegatron) उत्पादनाची सर्वात मोठी पुरवठादार कंपनी आहे. ही फॅक्टरी चेन्नईमध्ये आहे. सध्या जगभरात iPhone 15 ची क्रेझ आहे. ग्राहकांनी खरेदीसाठी रांगाच नाही तर धक्काबुक्की केल्याच्या वार्ता आल्या आहेत. नवीन दमदार आयफोन 15 ला जगभरातून जोरदार प्रतिसाद मिळत आहे. दरम्यान पेगट्रॉनच्या प्रकल्पामधून आलेल्या एका बातमीने चाहत्यांची चिंता वाढवली आहे. आयफोन तयार करणाऱ्या या फॅक्टरीने मंगळवारी कामकाज बंद ठेवण्याचा निर्णय घेतला आहे. एका घटनेमुळे हा निर्णय घेण्यात आला आहे. त्यामुळे या तैवानी कंपनीने सोमवारी काम बंदचा निर्णय घेतला होता. काय आहे घटनाक्रम..

काय घडली घटना

सोमवारी चेन्नईजवळील Pegatron फॅक्टरीत स्पार्किंगची घटना घडली. या आगीची घटना घडल्यानंतर तिच्यावर तातडीने नियंत्रण मिळविण्यात आले. जागतिक वृत्तसंस्था रॉयटर्सने याविषयीची बातमी दिली आहे. त्यानुसार, या आगीच्या घटनेमुळे मोठे आर्थिक नुकसान झाले नाही वा मोठा परिणाम झाला नाही. पण आता आगीची घटना का घडली याची माहिती घेण्यात येणार आहे. तसेच दुरुस्ती करण्यात येणार आहे.

इतके होते उत्पादन

Apple साठी या फॅक्टरीत आयफोन तयार करण्यात येतो. जवळपास 26,000 आयफोन तयार करण्याची या फॅक्टरीची क्षमता आहे. पण नवीन दमदार आयफोन बाजारात आणण्यासाठी येथील उत्पादन क्षमता सातत्याने वाढविण्यात आली. या ठिकाणी सध्या 8,000-12,000 iPhones चे प्रत्येक दिवशी उत्पादन होत असल्याचा अंदाज व्यक्त करण्यात येत आहे.

प्रतिक्रिया देण्यास नकार

या आगीच्या घटनेबाबत Pegatron ने प्रतिक्रिया देण्यास नकार दिला. तर Apple ने पण मत नोंदवले नाही. स्थानिक अधिकाऱ्यांच्या माहितीनुसार, आगीची माहिती मिळताच यंत्रणा तात्काळ आग विझवण्याच्या बंबासह पोहचली. याठिकाणी पाच तास हे काम सुरु होते. या घटनेत कोणीही जखमी झाले नाहीत, तसेच मोठ्या नुकसानीचा दावा करण्यात आलेला नाही. आगीची कोणती कारणे आहेत, याची चौकशी सुरु असल्याने त्याविषयी अधिक बोलण्यास अधिकाऱ्यांनी नकार दिला. Pegatron मध्ये ॲप्पलच्या आयफोनचे 10 टक्के उत्पादन करण्यात येते.