भारत की पाकिस्तान? मोबाईल कुठे आहे सगळ्यात स्वस्त? आकडे पाहून तुम्हीही थक्क व्हाल!

डिजिटल युगात स्मार्टफोन हे जीवनाचा अविभाज्य भाग झाले आहेत. कामकाज, मनोरंजन, शिक्षण आणि दैनंदिन व्यवहार यामध्ये स्मार्टफोनचा वापर मोठ्या प्रमाणात वाढला आहे. त्यामुळे ग्राहक चांगल्या फीचर्ससह परवडणाऱ्या स्मार्टफोन्सच्या शोधात असतात. मात्र, वेगवेगळ्या देशांमध्ये याच फोनच्या किमतीत लक्षणीय फरक आढळतो. भारत आणि पाकिस्तानमध्ये कोणत्या देशात स्मार्टफोन स्वस्त आहे, हे जाणून घेण्यासाठी आम्ही तीन लोकप्रिय मॉडेल्सची तुलना केली आहे.

iPhone 16 Pro Max: भारतात महाग, तरीही मागणी कायम

अॅपलचा फ्लॅगशिप फोन iPhone 16 Pro Max हा भारतात 1,35,900 रुपयांना मिळतो. त्याच वेळी पाकिस्तानात याची किंमत सुमारे 3,69,999 पाकिस्तानी रुपये (भारतीय चलनात जवळपास 1.16 लाख रुपये) इतकी आहे. म्हणजेच भारतात हा फोन सुमारे 20,000 रुपयांनी महाग आहे. या किंमतीमागे आयात शुल्क, जीएसटी आणि स्थानिक कर यांसारखे अनेक घटक जबाबदार आहेत. तरीही भारतात अॅपलची लोकप्रियता कमी झालेली नाही.

Samsung Galaxy S25 Ultra: भारतात किंमत अधिक आकर्षक

सॅमसंगचा नवीन Galaxy S25 Ultra हा फोन पाकिस्तानात सुमारे 1.56 लाख रुपयांना मिळतो, तर भारतात याची किंमत 1,41,999 रुपये आहे. या फोनमध्ये 12 GB RAM, 512 GB स्टोरेज आणि 5000 mAh क्षमतेची बॅटरी आहे. यामुळे भारतीय ग्राहकांसाठी हा फोन सुमारे 14 हजार रुपयांनी स्वस्त आणि अधिक किफायतशीर ठरतो.

Redmi Note 14 Pro: बजेट सेगमेंटमध्ये भारत आघाडीवर

मध्यमवर्गीयांसाठी रेडमी Note 14 Pro एक उत्तम पर्याय आहे. पाकिस्तानात याची किंमत जवळपास 29,000 रुपये आहे, तर भारतात तो फक्त 25,999 रुपयांना उपलब्ध आहे. 5500 mAh बॅटरी, 12 GB RAM, आणि फास्ट चार्जिंगसारखी वैशिष्ट्ये या किमतीत मिळणे भारतातील ग्राहकांसाठी फायदेशीर ठरते.

स्मार्टफोन खरेदी करताना भारतात काही ब्रँड्स स्वस्त मिळतात, तर काही महाग. एकंदरीत, बजेट फोनमध्ये भारतात किंमती अधिक आकर्षक आहेत, तर प्रीमियम फोनमध्ये किंमती थोड्या अधिक असल्या तरी पर्याय अधिक उपलब्ध आहेत. त्यामुळे ग्राहकांनी गरज आणि बजेटनुसार विचारपूर्वक निवड करणे फायदेशीर ठरेल.