एसीमुळे विजेचा वाढलेला खर्च टाळा,1.5 टन एसीसाठी किती सोलर पॅनल लागतील? हे जाणून घ्या

सध्या भारतात भीषण उकाडा जाणवत आहे. उत्तर भारतात तर तापमान ५० अंश सेल्सिअसच्या आसपास पोहोचले असून, एसीशिवाय जगणं कठीण झालं आहे. पण एसी चालवताना सर्वसामान्य माणसाला सर्वाधिक झळ पोहोचते ती म्हणजे वाढलेलं वीजबिल. एकीकडे उकाडा, दुसरीकडे वीजबिलाचा भार – या समस्येतून मार्ग म्हणून सोलर पॅनल हा उत्तम पर्याय म्हणून समोर येतो आहे.

सध्या अनेक लोक आपल्या घरांमध्ये सोलर पॅनल बसवत आहेत, जेणेकरून त्यांना विजेच्या महागड्या दरांपासून सुटका मिळेल. तुम्ही देखील जर 1.5 टन स्प्लिट एसी घरात वापरत असाल, तर हे जाणून घेणं आवश्यक आहे की यासाठी किती सोलर पॅनल लागतील आणि त्याचा फायदा काय होईल.

1.5 टन एसीची वीज खपत किती?

1.5 टन क्षमतेचा स्प्लिट एसी जर तुम्ही वापरत असाल, तर तो दर तासाला अंदाजे 1.5 ते 2 युनिट वीज खपत करतो. जर हा एसी तुम्ही रोज ८ तास चालवत असाल, तर दररोज 12 ते 16 युनिट विजेची गरज भासते. फाइव स्टार रेटिंग असलेले एसी थोडी कमी वीज घेतात, मात्र सरासरी वापराच्या दृष्टीने ही खपत गृहीत धरलेली आहे.

सोलर पॅनल किती युनिट वीज निर्माण करतो?

सामान्य 300 वॅटचा सोलर पॅनल प्रतिदिन 4 युनिट वीज निर्माण करू शकतो. त्यामुळे जर तुम्हाला एसी चालवण्यासाठी रोज 15 युनिट वीज लागणार असेल, तर किमान 4 ते 5 सोलर पॅनल लागतील.

सोलर पॅनल लावण्याचे फायदे काय?

सोलर पॅनल लावल्यानं सर्वात मोठा फायदा म्हणजे वीजबिलात मोठ्या प्रमाणात बचत होते. एकदाच केलेली गुंतवणूक ही अनेक वर्ष टिकते आणि दरमहा वीजबिल भरण्याचा त्रास कमी होतो. सौर ऊर्जा ही पर्यावरणपूरक आणि नवनिर्माणक्षम असल्याने ती प्रदूषणमुक्त ऊर्जा स्त्रोत मानली जाते. तसेच, सरकार सोलर पॅनलसाठी सबसिडी किंवा करसवलतीसारखे लाभही देते. शिवाय, वीजकपातीच्या काळातही सोलर पॅनलमुळे घरात आवश्यक उपकरणे चालू ठेवता येतात.

कोणत्या बाबी लक्षात ठेवाव्यात?

सोलर पॅनल बसवण्यापूर्वी काही गोष्टींचा विचार करणे गरजेचे आहे. सर्वात आधी घराच्या छतावर पुरेशी जागा आणि दिवसभर चांगला सूर्यप्रकाश मिळतो का हे पाहावे. याशिवाय, पॅनलची गुणवत्ता, सोलर इन्व्हर्टर, बॅटरी स्टोरेजची गरज आणि इंस्टॉलेशनचा खर्च लक्षात घ्यावा. स्थानिक हवामान, वर्षभर सूर्यप्रकाश किती वेळ मिळतो याचा सुद्धा अंदाज असावा. यामुळे तुमच्या सोलर सिस्टमची कार्यक्षमता अधिक चांगली राहील.

( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)