बीएसएनएल कंपनीच्या या किमतीच्या रिचार्ज प्लॅनची वैधता 19 दिवसांनी झाली कमी, आत फक्त इतकेच दिवस घेता येणार लाभ

भारत संचार निगम लिमिटेड म्हणजेच बीएसएनएलने त्यांच्या 197 रूपयांच्या प्रीपेड प्लॅनच्या वैधतेमध्ये एक महत्त्वपूर्ण बदल केला आहे. मात्र हा धक्का ग्राहकांना जोरदार बसला आहे. बीएसएनएलच्या 197 रूपयांच्या प्लॅनमध्ये गेल्या काही वर्षांत अनेक बदल झाले असून, प्रत्येक वेळी त्याची वैधता कमी करण्यात आली आहे. यापूर्वी, कंपनीने जुलै 2025 मध्ये वैधता कमी केली होती आणि आता, अवघ्या काही महिन्यांनंतर, या परवडणाऱ्या रिचार्ज प्लॅनची ​​वैधता पुन्हा एकदा कमी करण्यात आली आहे.

टेलिकॉमटॉकच्या माहितीनुसार बीएसएनएलच्या 197 रुपयांच्या प्लॅनमध्ये पूर्वी 70 दिवसांची वैधता होती, परंतु ती शेवटची 54 दिवसांपर्यंत कमी करण्यात आली होती आणि आता कंपनीने पुन्हा एकदा वैधता 35 दिवसांपर्यंत कमी केली आहे. म्हणजेच 197 रुपयांचा प्लॅन आणि 35 दिवसांच्या वैधतेनुसार, दैनंदिन खर्च अंदाजे 5.63 रुपये येतो.

वैधतेबद्दल जाणून घेतल्यानंतर आपण आता या प्लॅनसोबत मिळणारा डेटा आणि इतर फायदे जाणून घेऊयात. या प्लॅनमध्ये 5 जीबी हाय-स्पीड डेटा आणि 100 एसएमएस मिळतात.

येथे एक गोष्ट लक्षात घेण्यासारखी आहे की, या प्लॅनमध्ये 300 मिनिटांचे व्हॉईस कॉलिंग आणि अनलिमिटेड डेटा मिळतो. तसेच 5 जीबी डेटा संपल्यानंतर स्पीड 40 केबीपीएस पर्यंत कमी होईल. बीएसएनएलचा 197 रुपयांचा प्लॅन देशभरातील वापरकर्त्यांसाठी अद्ययावत लाभांसह उपलब्ध आहे. तुम्ही हा प्लॅन बीएसएनएल सेल्फकेअर किंवा कंपनीच्या अधिकृत वेबसाइटवरून रिचार्ज करू शकता.

एअरटेल 199 रूपयांच्या प्लॅनची ​​माहिती

एअरटेलच्या 199 रुपयांच्या प्लॅनमध्ये २८ दिवसांच्या वैधतेसह २ जीबी हाय-स्पीड डेटा मिळतो. या प्लॅनमध्ये अनलिमिटेड व्हॉईस कॉलिंग आणि दररोज 100 एसएमएस मेसेजेससुद्धा मिळतात. अतिरिक्त फायद्यांमध्ये 12 महिन्यांच्या वैधतेसह ॲडोबी एक्सप्रेस प्रीमियमचा समावेश आहे, ज्याची किंमत अंदाजे 4 हजार रुपये आहे. या प्लॅनमध्ये दर 30 दिवसांनी एकदा मोफत हॅलोट्यून, स्पॅम अलर्ट्स आणि एअरटेल एक्सस्ट्रीम प्ले सुद्धा मिळतात.