Viral Photo : नाशकातल्या द्राक्षबागेत कवट्या महाकाळची एन्ट्री? फोटोमागचं नक्की कारण तरी काय?

नाशिक: इंटरनेटवर कधी काय व्हायरल होईल हे सांगता येत नाही. त्यातल्या त्यात शेती संबंधिचे  (Farmer Video) अनेक जुगाडही सोशल मीडियावर (Social Media) लगेच व्हायरल होत असतात. आता असाच एक फोटो चांगलाच व्हायरल (Viral) होत आहे. हा फोटो पाहून अनेकजण कोड्यात पडले आहे. हा फोटो आहे, भुताच्या चेहऱ्याचे मास्क घातलेल्या काही व्यक्तीचा, जे द्राक्षबागेत काहीतरी घेऊन जाताना दिसत आहेत.

हा फोटो पाहिल्यानंतर, ज्यांना शेतीतलं माहित नाही, त्यांना नक्कीच प्रश्न पडला असेल, हे आहे तरी काय? हा फोटो व्हायरल झाल्यानंतर अनेकांना महेश कोठारेंच्या धडाकेबाज चित्रपटातल्या कवठे महाकाळची आठवण झाली. अगदी असेच मास्क घालून त्या चित्रपटात व्हिलनची एन्ट्री दाखवण्यात आली आहे. त्यामुळे ही काय चित्रपटाची शुटींग आहे का? असा प्रश्न अनेकांना पडला आहे.

मात्र मंडळी, थोडं थांबा. ही काय चित्रपटाची शुटींग नाही, तर द्राक्षबागेत होणारं एक महत्त्वाचं काम आहे. जे काम द्राक्ष उत्पादक शेतकऱ्यांना नेहमी करावं लागतं. पण ते करत असताना, त्यांच्या जीवालाही मोठा धोका असतो. हाच धोका टाळण्यासाठी शेतकरी असा काहीतरी जुगाड करतात.

पाहा फोटो:

द्राक्षबागेत दरवर्षी फळ छाटणी होते, म्हणजेच द्राक्ष उतरवली जातात. द्राक्ष उतरवल्यानंतर पुन्हा एकदा बागांचीही छाटणी केली जाते. द्राक्षबागा पुन्हा एकसारख्या बहरण्यासाठी फळ छाटणीनंतर त्यावर हायड्रोनजन सायनामाईटचा वापर केला जातो. त्यामुळे काड्यांची फूट एकसारखी निघते. हे केमिकल अत्यंत घातक आणि विषारी असतं. जे श्वासात गेलं तरी मृत्यू होण्याचा धोका असतो. हे केमिकल द्राक्षबागांमध्ये वापरताना संपूर्ण शरीर झाकण्याची, विशेषत: चेहरा झाकण्यासाठी विशेष ड्रेस वापरण्याचा सल्ला दिला जातो.

मात्र, दरवेळी इतका पैसा यावर खर्च करणंही शक्य नसतं, अशावेळी काही शेतकरी असा जुगाड करतात. ज्यात चेहरा कुठल्यातरी मास्कने पूर्णपणे झाकला जातो, अंगही झाकलं जातं. ज्यातून शेतकरी स्वत:ची काळजी घेत असतो. हाच जुगाड या द्राक्षबागेत वापरण्यात आला आहे. ज्याचा फोटो आता व्हायरल होत आहे. त्यामुळे मंडळी, शेतकऱ्यांच्या या कष्टाचं जेवढं कौतुक करावं, तेवढं कमीच आहे.