Bharat Gogawale : पडद्यामागून बराचसा हस्तक्षेप, शिवसेनेच्या फुटीमागे रश्मी ठाकरेंचा हात.. गोगावलेंच्या दाव्यानं खळबळ

शिवसेना प्रमुख बाळासाहेब ठाकरे यांनी स्थापन केलेल्या शिवसेना या पक्षात फूट पडली. या फुटीनंतर शिवसेना या पक्षाचे दोन गट झाले एक उद्धव ठाकरेंचा आणि दुसरा एकनाथ शिंदे यांचा… शिवसेना या पक्षाच्या फुटीची सल शिवसैनिकांच्या मनातून काही जाताना नाही. शिवसेना फुटीचा विषय निघाला तर दोन्ही गटातील शिवसैनिकांकडून काही घटना, आठवणींवर भाष्य करताना भावना आपसूक व्यक्त केल्या जातात. अशातच एकनाथ शिंदे यांच्या शिवसेनेचे नेते भरतशेठ गोगावले यांनी मोठा खळबळजनक दावा केलाय. शिवसेना पक्षाच्या फुटीमागे वहिनींचा हात असल्याचा बॉम्बच गोगावलेंनी टाकलाय.

‘आम्ही शिवसेनमधून बाहेर पडायला अनेक कारण आहेत. महिलांचा कुठपर्यंत हस्तक्षेप घ्यायला पाहिजे विचार करायला पाहिजे. पडद्यामागून वहिनींचा हस्तक्षेप बराचसा होता. महाविकास आघाडीची सत्ता असताना मुख्यमंत्री पद हे एकनाथ शिंदे यांना दिलं पाहिजे होते आणि आदित्य ठाकरे यांना कॅबिनेट मंत्री पद द्यायला नको होते. पक्षातील लोकांना संधी द्यायला हवी होती’, असं गोगावले म्हणाले. तर बाळासाहेबांच्या कामाची पध्दत आम्हाला उध्दवसाहेबांमध्ये दिसली नाही. माझ्या वाढदिवसाला बाळासाहेबांना भेटायला गेलो तेव्हा बाळासाहेब बोलले खाली बसायचं नाही. तुला खुर्ची मी देणार आहे आणि काढून घेणाराही मी आहे. बाळासाहेब गेल्यानंतरचा कारभार आम्हाला आवडला नाही, असेही गोगावले स्पष्ट म्हणाले.