Pankaja Munde : मी धनुभाऊंना परळी देऊन टाकली! पकंजा मुंडे यांचं भुवया उंचावणारं विधान

“परळी धनुभाऊंना देऊन टाकली!” असे विधान करून पंकजा मुंडे यांनी नव्या राजकीय चर्चेला सुरुवात केली आहे. त्यांच्या या वक्तव्यामुळे अनेक प्रश्न निर्माण झाले आहेत की, यापुढे त्या परळीतून निवडणूक लढणार नाहीत का आणि भविष्यात धनंजय मुंडेच परळीतून मुंडे घराण्याचे प्रतिनिधित्व करतील का? माळाकोळी येथे दिवंगत गोपीनाथ मुंडे यांच्या स्मारकाच्या उद्घाटनावेळी पंकजा मुंडे यांनी माळाकोळीवर प्रेम करण्याची इच्छा व्यक्त केली. “परळीचे प्रेम धनुभाऊंना करू द्या, मी त्यांना परळी देऊन टाकली आहे, मला माळाकोळीवर प्रेम करू द्या,” असे त्या म्हणाल्या. माळाकोळी हे लोहा विधानसभा मतदारसंघात येते. त्यामुळे भविष्यात पंकजा मुंडे लोहा मतदारसंघातून निवडणूक लढवणार का, अशी चर्चा सुरू झाली आहे. परळी विधानसभा हा गेली ४५ वर्षे मुंडे घराण्याचा बालेकिल्ला राहिला आहे.