शेतकऱ्यांना बांधावरून चालावं लागतं, मंत्र्यांसाठी रॅम्प कशाला? पाहणी दरम्यान बावनकुळे संतापले

नांदेडच्या अर्धापूर तालुक्यात राज्याचे महसूलमंत्री चंद्रशेखर बावनकुळे यांनी दुष्काळग्रस्त भागाची पाहणी केली. या दौऱ्यादरम्यान, अधिकाऱ्यांनी मंत्रीमहोदयांना शेतात जाण्यासाठी सोयीस्कर व्हावे म्हणून एका शेतकऱ्याच्या शेतात तात्पुरता रस्ता (रॅम्प) बनवला होता. हा रस्ता मोठ्या प्रमाणात खडक वापरून तयार करण्यात आला होता, आणि विशेष म्हणजे ज्या शेतकऱ्याच्या शेतात तो बनवला होता, त्यालाही याची कल्पना नव्हती.

अधिकाऱ्यांनी दाखवलेल्या या तत्परतेची चर्चा संपूर्ण दौऱ्यात जास्त झाली. मात्र, महसूलमंत्री बावनकुळेंनी या वादग्रस्त रस्त्याचा वापर टाळला. त्यांनी दुसऱ्या मार्गाने शेतात जाऊन पाहणी केली. मंत्री आल्यावर असे तात्पुरते रस्ते बनवणे योग्य नाही, असे मत त्यांनी व्यक्त केले. “शेतकरी बांधावरून उड्या मारून जातात आणि मंत्री आले की रॅम्प करून जा, ही भूमिका मला मान्य नाही,” असे बावनकुळेंनी स्पष्ट केले. या घटनेने प्रशासकीय कार्यशैलीवर प्रश्नचिन्ह निर्माण झाले.