ZP Election Sambhajinagar: आमदार विलास भुमरेंनी मतदानावेळी ईव्हीएम जवळ मुलालाही नेलं

छत्रपती संभाजीनगर जिल्ह्यातील पाचोड मतदान केंद्रावर मतदान प्रक्रियेदरम्यान एक अनोखी घटना समोर आली आहे. शिवसेनेचे (शिंदे गट) आमदार विलास भुमरे यांनी मतदानावेळी आपल्या लहान मुलाला EVM जवळ नेल्याचे वृत्त आहे. केवळ EVM जवळ नेणेच नव्हे, तर भुमरे यांनी स्वतः मतदान केल्यानंतर मुलाच्या बोटालाही मतदानाची शाई  लावल्याचा प्रकार घडला.

सदर घटनेची माहिती समोर येताच राजकीय आणि सामाजिक वर्तुळात याबाबत चर्चा सुरू झाली आहे. नियमांनुसार, मतदान केंद्रावर लहान मुलांना EVM जवळ घेऊन जाण्यास किंवा त्यांना मतदानाच्या प्रक्रियेत सहभागी करून घेण्यास सहसा परवानगी नसते. निवडणूक प्रक्रियेच्या गोपनीयतेसाठी आणि पावित्र्यासाठी ही बाब अत्यंत महत्त्वाची मानली जाते. आमदार विलास भुमरे यांच्या या कृतीवर आता विविध स्तरातून टीका होत आहे. एका लोकप्रतिनिधीकडून अशा प्रकारे नियमांचे उल्लंघन झाल्याने अनेक प्रश्न उपस्थित झाले आहेत. मतदान भुमरेंनी केले की त्यांच्या मुलाने? हा प्रश्न सध्या मोठ्या प्रमाणावर चर्चिला जात आहे. छत्रपती संभाजीनगरमध्ये घडलेल्या या प्रकारामुळे मतदारांमध्ये संभ्रम निर्माण झाला असून, या घटनेचे पडसाद उमटण्याची शक्यता आहे.