अंगावर पंजा अन् पक्षाचा झेंडा, काँग्रेस कार्यकर्त्याच्या अनोख्या प्रचारानं वेधलं लक्ष; नागपूरमध्ये तुफान चर्चा

नागपूर महानगरपालिका निवडणुकीच्या रणधुमाळीत उमेदवार विविध मार्गांनी मतदारांना आकर्षित करत आहेत. प्रभाग क्रमांक ३२ मध्ये काँग्रेसचे निष्ठावान कार्यकर्ते अनंता बोरीकर यांचा प्रचार सध्या चर्चेचा विषय बनला आहे. अनंता बोरीकर यांनी पूर्णपणे काँग्रेसचा पेहराव केला असून, अंगावर पक्षाचे चिन्ह दाखवत ते मतदारांचे लक्ष वेधून घेतात.

बोरीकर यांनी दिलेल्या माहितीनुसार, ते केवळ पक्षासाठी, म्हणजेच काँग्रेससाठी हा प्रचार करत आहेत. त्यांनी भारतभर फिरून राहुल गांधींची भेट घेतल्याचे सांगितले. देशातील वाढता भ्रष्टाचार, युवकांना नोकरी आणि शिक्षणाच्या संधींचा अभाव या मुद्द्यांवर त्यांनी चिंता व्यक्त केली. आपला हा अनोखा प्रचार लोकांच्या मनात काँग्रेसचा विचार रुजवेल असा विश्वास त्यांनी यावेळी व्यक्त केला. तर उन्हातान्हात दिवसभर फिरत असतानाही त्यांना थकवा जाणवत नाही, कारण त्यांचे हे कार्य पक्षाला समर्पित आहे, असे ते सांगतात.

काँग्रेस कार्यकर्त्याच्या या अनोख्या प्रचारामुळे लोकांकडून स्थानिक समस्या जाणून घेऊन त्या समस्या कशाप्रकारे सोडवल्या जातील यावर भर दिला आहे. जनतेशी थेट संवाद साधणे, त्यांच्या प्रचारामध्ये शहरातील नागरिकांना अधिकाधिक सहभागी करून घेण्यावर भर देण्यात आला आहे.