Devendra Fadnavis : CM फडणवीसांचा जेन-झींशी संवाद, क्रिकेटपटू तिलक वर्मासह 10 हजारांहून अधिक तरुणांची उपस्थिती
मुख्यमंत्री देवेंद्र फडणवीस यांनी नागपुरात जेन-झी तरुणांशी संवाद साधला. १०,००० हून अधिक तरुणांच्या उपस्थितीत झालेल्या कार्यक्रमात त्यांनी आपले जुने अनुभव सांगितले. लोकशाहीचे महत्त्व पटवून देताना, लाल चौक आणि रामजन्मभूमी आंदोलनातील सहभागासारखे किस्से सांगून त्यांनी तरुणांना प्रेरणा दिली. या कार्यक्रमाला खेळाडूंचीही उपस्थिती होती.
मुख्यमंत्री देवेंद्र फडणवीस यांनी आज नागपूरच्या रेशीमबाग मैदानावर जेन-झी अर्थात युवा पिढीतील तरुणांशी संवाद साधला. या कार्यक्रमाला १०,००० हून अधिक तरुणांनी उत्स्फूर्तपणे हजेरी लावली होती, ज्यामुळे एक भव्य सोहळा पाहायला मिळाला. या वेळी ४,००० ढोल ताशा वादकांनी एकाच वेळी वादन करून एक नवा विक्रम प्रस्थापित केला. भारतीय क्रिकेटपटू तिलक वर्मा, बुद्धिबळपटू दिव्या देशमुख आणि धावपटू दिलीप गावित यांसारख्या खेळाडूंनीही या कार्यक्रमाला उपस्थिती लावली. या संवादात फडणवीस यांनी आपले जुने किस्से आणि जीवनातील अनुभव कथन केले.
भारतीय लोकशाहीचे महत्त्व अधोरेखित करताना ते म्हणाले, “आपल्या संविधानाने दिलेल्या लोकशाहीमुळेच माझ्यासारखा सामान्य कार्यकर्ता मुख्यमंत्री पदापर्यंत पोहोचू शकला.” त्यांनी देशाच्या पंतप्रधानांचे उदाहरण देत युवा शक्ती आणि संविधानाची ताकद स्पष्ट केली. आपल्या राजकीय प्रवासाची सुरुवात कशी झाली, याचे किस्से सांगताना त्यांनी वयाच्या १८ व्या वर्षी विद्यार्थी परिषदेसोबत श्रीनगरच्या लाल चौकात तिरंगा फडकवण्याचा निर्धार आणि वयाच्या २० व्या वर्षी रामजन्मभूमी आंदोलनात सहभाग घेऊन तुरुंगवास भोगल्याची आठवण करून दिली. हे अनुभव ऐकून उपस्थित तरुण भारावून गेले.
