नवी मुंबई ते गेट वे ऑफ इंडियापर्यंत वॉटर टॅक्सी; महायुतीच्या जाहीरनाम्यातून घोषणा

देवेंद्र फडणवीस यांनी मुंबईसाठी अनेक महत्त्वाकांक्षी प्रकल्पांची घोषणा केली आहे, ज्यामध्ये नवी मुंबई ते गेटवे ऑफ इंडियापर्यंत वॉटर टॅक्सी सेवा सुरू करण्याचे नियोजन आहे. या वॉटर टॅक्सीसाठी पर्यायी इंधन किंवा हायब्रीड तंत्रज्ञानाचा वापर केला जाणार आहे. भविष्यात हे जलवाहतूक सेवा वन मुंबई ॲप अंतर्गत मेट्रो, मोनो, उपनगरीय रेल्वे आणि बस सेवेसोबत एकत्रित केली जाईल, ज्यामुळे एकाच तिकिटावर संपूर्ण MMR प्रदेशात प्रवास करणे शक्य होईल.

मुंबईतील वाहतूक कोंडी कमी करण्यावरही भर दिला जात आहे. यामध्ये बांद्रा-वर्सोवा सी-लिंक पूर्ण करण्यासोबतच वर्सोवा ते विरारपर्यंतच्या मार्गाचा विस्तार, तसेच ठाणे ते बोरीवली आणि मुलुंड ते गोरेगावदरम्यान बोगद्यांची कामे सुरू आहेत. यामुळे पूर्वेकडील आणि पश्चिमेकडील वाहतूक व्यवस्थेत सुधारणा होईल. शिवाय, यंदा शिवडी ते वरळी पूल पूर्ण करण्याचे लक्ष्य आहे, ज्यामुळे मुंबई आणि नवी मुंबई विमानतळाला सीमलेस कनेक्टिव्हिटी मिळेल.

महिलांच्या सबलीकरणासाठीही महत्त्वाचे निर्णय घेण्यात आले आहेत. बेस्ट बसमध्ये महिलांना 50% सवलत मिळेल, तसेच महानगरपालिकेमार्फत मुंबईतील महिलांना ₹5 लाखांपर्यंत बिनव्याजी कर्ज उपलब्ध करून दिले जाईल, ज्यामुळे त्यांना स्वतःचा व्यवसाय सुरू करून लखपती दीदी बनण्यास मदत होईल. महानगरपालिकेच्या कारभारात पारदर्शकता आणण्यासाठी एआय तंत्रज्ञानाचा वापर करून 24 तासांत बांधकाम योजनांना मंजुरी दिली जाईल, तसेच खर्चावर नियंत्रण ठेवण्यासाठी समवर्ती लेखापरीक्षण (concurrent audit) प्रणाली लागू केली जाईल.