डॉ. डी. वाय. पाटील यांना अखेरचा निरोप, शासकीय इतमामात अंत्यसंस्कार

कोल्हापूरचे ज्येष्ठ काँग्रेस नेते, माजी राज्यपाल आणि शिक्षण क्षेत्रातील मान्यवर डॉ. ज्ञानदेव यशवंतराव पाटील उर्फ डॉ. डी. वाय. पाटील यांचे 4 ऑगस्ट 2026 रोजी निधन झाले. ते 90 वर्षांचे होते. त्यांच्या निधनाने राजकीय, सामाजिक आणि शैक्षणिक क्षेत्रात शोककळा पसरली आहे. आज त्यांच्यावर थोड्याच वेळात शासकीय इतमामात अंत्यसंस्कार करण्यात येणार आहेत.

गेल्या काही महिन्यांपासून डॉ. पाटील यांची प्रकृती ठीक नसल्याची माहिती समोर आली होती. त्यांच्या निधनानंतर विविध क्षेत्रांतील मान्यवरांकडून दुःख व्यक्त केले जात आहे. त्यांच्या कार्याची आठवण काढत अनेकांनी श्रद्धांजली अर्पण केली आहे. त्यांच्या अंत्यसंस्कारासाठी समर्थक, कार्यकर्ते आणि विविध क्षेत्रांतील नागरिक उपस्थित राहणार आहेत. डॉ. डी. वाय. पाटील यांनी राजकीय कारकिर्दीत राज्य सरकारमध्ये मंत्री म्हणूनही जबाबदारी पार पाडली होती.

राजकारणाबरोबरच त्यांनी सामाजिक आणि शैक्षणिक क्षेत्रातही उल्लेखनीय काम केले. त्यांच्या या कार्याची राष्ट्रीय पातळीवर दखल घेण्यात आली होती. समाज आणि शिक्षण क्षेत्रातील योगदानासाठी भारत सरकारने त्यांना पद्मश्री या नागरी पुरस्काराने गौरविले होते. त्यांच्या निधनामुळे महाराष्ट्राने एक ज्येष्ठ राजकीय, सामाजिक आणि शैक्षणिक व्यक्तिमत्त्व गमावले आहे. त्यांच्या कार्याचा ठसा महाराष्ट्राच्या सार्वजनिक जीवनात कायम स्मरणात राहणार आहे.