CM फडणवीसांचा विरोधकांवर निशाणा, निवडणूक आयोगावरील आरोपांवरून सुनावलं

मुख्यमंत्री देवेंद्र फडणवीस यांनी पराभवानंतर संवैधानिक संस्थांना बदनाम करणाऱ्या विरोधकांच्या प्रवृत्तीवर तीव्र टीका केली आहे. “जे जे लोकं हरतात, त्या त्या लोकांना हरण्याचं खापर निवडणूक आयोगावर फोडायची इच्छा असते,” असे फडणवीस म्हणाले. तेलंगणा, पंजाब, हिमाचल किंवा कर्नाटकमध्ये जिंकल्यावर निवडणूक आयोग चांगला असतो, पण भाजप जिंकल्यास त्याच आयोगाला लगेच वाईट ठरवले जाते, या दुटप्पी भूमिकेवर त्यांनी प्रकाश टाकला. ईव्हीएमच्या संदर्भात सर्वोच्च न्यायालयाने दिलेल्या निकालाचा आणि निवडणूक आयोगाने ईव्हीएम हॅक करण्याचे दिलेले आव्हान कोणीही स्वीकारू शकले नाही, याचा त्यांनी उल्लेख केला.

त्यामुळे विरोधकांनी आता ईव्हीएम सोडून थेट निवडणूक आयोगालाच घेरण्याचा प्रयत्न चालवला आहे, असे त्यांचे म्हणणे आहे. जनतेने नाकारल्यावर संवैधानिक संस्थांवर प्रश्नचिन्ह उपस्थित करणे चुकीचे असून, जनतेमध्ये जाऊन त्यांचे प्रश्न मांडण्याचे आवाहन त्यांनी विरोधकांना केले. मतदार यादीतील सुधारणा (एसआयआर) आणि दुष्काळग्रस्त तालुक्यांसाठी जाहीर केलेल्या उपाययोजनांवरही त्यांनी यावेळी भाष्य केले.