Photo | कर्जमाफी प्रमाणपत्राची प्रत व्हायरल, सोशल मीडियावर नेमकी कसली चर्चा?

पुण्यश्लोक अहिल्यादेवी होळकर शेतकरी कर्जमुक्ती योजना 2026 अंतर्गत लाभार्थ्यांना देण्यात येणाऱ्या कर्जमाफी प्रमाणपत्राची प्रत सध्या सोशल मीडियावर मोठ्या प्रमाणात व्हायरल होत आहे. या प्रमाणपत्रावरील छायाचित्रांमुळे आणि त्याच्या स्वरूपामुळे विविध स्तरांवर चर्चा सुरू झाली आहे.

राज्य सरकारने काही दिवसांपूर्वीच कर्जमुक्ती योजनेची पहिली यादी जाहीर केली होती. त्यानंतर कृषीमंत्री दत्तात्रय भरणे यांनी वेळोवेळी योजनेबाबत माहिती देत लाभार्थ्यांना दिलासा देण्याचा प्रयत्न केला आहे. आता समोर आलेल्या प्रमाणपत्रामुळे या योजनेची पुन्हा चर्चा रंगली आहे.

व्हायरल होत असलेली ही प्रत पुणे जिल्ह्यातील एका शेतकऱ्याच्या नावाची असल्याचा दावा केला जात आहे. प्रमाणपत्रावर योजनेची माहिती, लाभार्थ्याचा तपशील आणि संबंधित अधिकाऱ्यांच्या स्वाक्षऱ्या दिसत आहेत. मात्र, या प्रमाणपत्रावरील छायाचित्रांबाबत सोशल मीडियावर विविध प्रतिक्रिया उमटत आहेत.

दरम्यान, कर्जमाफी योजनेची अंमलबजावणी टप्प्याटप्प्याने सुरू असून, पात्र लाभार्थ्यांना प्रमाणपत्रांचे वितरण करण्यात येणार असल्याची माहिती समोर येत आहे.