Gokul Milk Price Hike : गोकुळ दूध महागणार? खरेदी आणि विक्री दरात प्रत्येकी एवढ्या रुपयांची वाढ होण्याची शक्यता; ग्राहकांच्या खिशाला बसणार फटका

पश्चिम महाराष्ट्रातील अग्रगण्य दूध उत्पादक संघ गोकुळच्या दूध खरेदी आणि विक्री दरामध्ये लवकरच वाढ होण्याची शक्यता आहे. मिळालेल्या माहितीनुसार, दूध खरेदी दरात आणि विक्री दरात प्रत्येकी दोन रुपयांची वाढ अपेक्षित आहे. गोकुळच्या संचालक मंडळाच्या पहिल्याच बैठकीमध्ये या दरवाढीसंदर्भात निर्णय होण्याची शक्यता वर्तवण्यात येत आहे.

प्रशासक काळात गोकुळ दूध संघाला सुमारे २४ कोटी रुपयांचा तोटा झाल्याची माहिती समोर आली आहे. या तोट्याची भरपाई करण्यासाठी आणि शेतकऱ्यांना योग्य दर देण्यासाठी ही दरवाढ आवश्यक असल्याचे बोलले जात आहे. दूध दरातील या वाढीमुळे दूध उत्पादक शेतकऱ्यांना दिलासा मिळण्याची अपेक्षा आहे, परंतु याचा थेट परिणाम ग्राहकांच्या खिशावर होणार आहे. अंतिम निर्णय संचालक मंडळाच्या बैठकीत घेतला जाईल.