Mohit Kamboj : कामराच्या स्टुडिओची तोडफोड अन् मोहित कंबोज म्हणाले, ‘अभी तो सिर्फ स्टूडिओ टूटा है दोस्त, पिक्चर तो अभी…’

मुंबईतील ज्या स्टुडिओमध्ये कॉमेडियन कुणाल कामराचा कार्यक्रम द हॅबिटॅट स्टुडिओ येथे रेकॉर्ड करण्यात आला होता. तो स्टुडिओ शिवसनेच्या कार्यकर्त्यांनी फोडला. याच स्टुडिओमध्ये कुणाल कामराने महाराष्ट्राचे उपमुख्यमंत्री एकनाथ शिंदे यांच्याबद्दल वादग्रस्त टिप्पणी केली होती. कामरा याने शिंदे यांना गद्दार म्हटले होते. यासह शिंदे यांचे नाव न घेता त्यांच्या राजकीय जीवनाचीही खिल्ली उडवली. एका कॉमेडी शो दरम्यान, कुणाल कामराने महाराष्ट्राच्या राजकारणाबद्दल विडंबनात्मक भाष्य केले. यादरम्यान, कामराने एकनाथ शिंदेंवर निशाणा साधला. शिंदे यांनी उद्धव ठाकरेंची शिवसेना फोडली तेव्हाच्या घटनेचा उल्लेख कामराने केला. कुणाल कामरा म्हणाला की, शिवसेना भाजपमधून सर्वात आधी बाहेर पडली. मग शिवसेनेतून शिवसेना बाहेर पडली. राष्ट्रवादी काँग्रेसमधून राष्ट्रवादी बाहेर पडली. एका मतदाराला ९ बटणे देण्यात आली. म्हणून सगळे गोंधळले… यावरूनच शिवसेनेची शिवसेना आक्रमक झाली असताना भाजप नेते आणि आपल्या वक्तव्यामुळे अनेकदा राजकीय वर्तुळात चर्चेत येणारे देवेंद्र फडणवीस यांचे निकटवर्तीय मोहित कंबोज यांनीही ट्वीट करत तोडफोड करणाऱ्या शिवसैनिकांचे कौतुक केले.