Ladki Bahin Yojana Video : लाडक्या बहिणींसाठी मोठी बातमी; अपात्र तरीही भरला अर्ज, पैसे घेणार रिटर्न? राज्य सरकारनं स्पष्टच म्हटलं…

महायुती सरकारला निवडणुकीत महाविजय मिळवून देण्यासाठी निवडणुकीच्या तोंडावर जाहीर करण्यात आलेली लाडकी बहीण योजना ही गेमचेंजर ठरली. मात्र त्यावेळी सर्रास सरसकट सगळ्याच महिलांना या योजनेचा लाभ घेतला. मात्र आता निकषबाह्य अर्थात अपात्र असलेल्या महिलांकडून सरकार पैसे परत घेणार असल्याची चर्चा महिलांमध्ये सुरू झाली आहे. तर ज्यांनी अपात्र असताना देखील अर्ज भरलेत अशा महिलांकडून आतापर्यंत देण्यात आलेल्या हप्त्याचे पैसे दंडासह वसूल करण्यात येणार असल्याची चर्चा गेल्या काही दिवसांपासून सुरू असल्याचे पाहायला मिळत आहे. लाभार्थ्यांमध्ये निर्माण झालेल्या भीतीच्या पार्श्वभूमीवर राज्य सरकारकडून लाडकी बहीण योजनेबाबत स्पष्टीकरण देण्यात आलं आहे. सुरू असलेल्या चर्चा आणि अफवांदरम्यान, राज्य सरकारकडून स्पष्टीकरण देतांना असं म्हटलं की, लाडकी बहीण योजनेचे पैसे सक्तीने परत घेणार नाही. दरम्यान, जे अपात्र आहेत आता ते समोर येऊन पुढील लाभ नको असं म्हणत अर्ज केल्याची माहिती आहे. तर अर्ज केलेल्या या महिलांचे पैसे सक्तीने परत घेण्यात येणार नसल्याचे राज्य सरकारकडून सांगण्यात आलंय. ‘मुख्यमंत्री माझी लाडकी बहीण योजने’मधील लाभार्थी महिलांकडून त्यांना दिलेला लाभ शासनाकडून सक्तीने परत घेण्यात येत आहे, अथवा घेण्यात येणार असल्याबाबत बातम्या खोट्या आहेत, असे स्पष्टीकरण महिला व बालविकास विभागाचे सचिव अनुपकुमार यादव यांच्याकडून देण्यात आलंय.