देवाभाऊ-शिंदेभाऊंना लाडक्या बहिणींचा खर्च जड झाला का?; सुनेत्रा पवारांना रोहिणी खडसेंचं थेट आवाहन, म्हणाल्या…

मुख्यमंत्री माझी लाडकी बहीण योजनेच्या वाढत्या खर्चावरून राज्यातील राजकारण पुन्हा तापण्याची चिन्हे दिसत आहेत. राष्ट्रवादी काँग्रेस (शरदचंद्र पवार) पक्षाच्या नेत्या रोहिणी खडसे यांनी सरकारवर टीका करत, योजनेवरील खर्च सरकारला जड होऊ लागला आहे का, असा सवाल उपस्थित केला आहे.

माध्यमांशी संवाद साधताना रोहिणी खडसे म्हणाल्या की, सरकारमधीलच काही लोकांकडून लाडकी बहीण योजनेवरील खर्च मोठ्या प्रमाणात वाढल्याची माहिती दिली जात आहे. त्यांच्या म्हणण्यानुसार, या योजनेवरील खर्च यापूर्वी सुमारे 26 हजार कोटी रुपये होता, मात्र आता तो वाढून जवळपास 32 हजार कोटी रुपयांपर्यंत पोहोचला आहे. म्हणजेच सुमारे साडेसहा ते सात हजार कोटी रुपयांची वाढ झाल्याचा दावा त्यांनी केला.

यावेळी त्यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यावरही अप्रत्यक्ष निशाणा साधत, “लाडक्या बहिणींवरील हा वाढलेला खर्च सरकारला जड होऊ लागला आहे का?” असा प्रश्न उपस्थित केला.

दरम्यान, रोहिणी खडसे यांनी राष्ट्रवादी काँग्रेसच्या नेत्या सुनेत्रा पवार यांनाही आवाहन केले. “महाराष्ट्रातील लाडक्या बहिणींच्या पाठीशी तुम्ही उभे राहावे आणि या योजनेबाबत स्पष्ट भूमिका घ्यावी,” अशी विनंती त्यांनी केली.

दरम्यान, रोहिणी खडसे यांनी केलेल्या या वक्तव्यानंतर लाडकी बहीण योजनेच्या निधी आणि खर्चावरून राजकीय चर्चा पुन्हा रंगण्याची शक्यता व्यक्त केली जात आहे.