जयघोष, फुलांची उधळण अन् भक्तांची गर्दी; लालबागच्या राजाच्या विसर्जना आणखी उशिर

मुंबईत अनंत चतुर्दशीच्या निमित्ताने सुरू झालेल्या गणपती विसर्जन मिरवणुका दुसऱ्या दिवशीही सुरू आहेत. लालबागचा राजा गिरगाव चौपाटीच्या दिशेने मार्गस्थ झाला असून, त्याची भव्य मिरवणूक पाहण्यासाठी गणेशभक्तांची गर्दी झाली आहे. फुलांचे हार अर्पण करून आणि उत्साहाने घोषणा देत भक्त राजाचे स्वागत करत आहेत.

गिरगावात पोहोचल्यानंतरही राजाला चौपाटीपर्यंत पोहोचायला वेळ लागणार आहे. मागच्या वर्षीचा विसर्जनाचा रेकॉर्ड मोडला जातो का, याकडे सर्वांचे लक्ष लागले आहे. याचसोबत इतरही अनेक मोठ्या सार्वजनिक गणेशोत्सव मंडळांचे गणपती विसर्जनासाठी गिरगाव चौपाटीकडे पुढे सरकत आहेत. पोलिसांकडून या संपूर्ण मिरवणुकीवर लक्ष ठेवले जात आहे. तसेच, मिरवणूक पुढे सरकण्यासाठी आवाहन केले जात आहे. मुंबई आणि पुण्यासह अनेक शहरांमध्ये विसर्जनाचा हा सोहळा तासनतास सुरू असतो.