Maharashtra MLC Election 2026 Result : 25-25 मतांचे गठ्ठे, पसंतीक्रमाची मोजणी; विधानपरिषद निवडणुकीचा निकाल नेमका कधी लागणार?

आज महाराष्ट्र विधानपरिषदेच्या पाच जागांसाठी मतमोजणी प्रक्रिया सुरू झाली आहे. शिक्षक आणि पदवीधर मतदारसंघातील या जागांवर 182 उमेदवार रिंगणात असून, महायुती आणि महाविकास आघाडी (मविआ) मधील बंडखोरीमुळे लढत अत्यंत चुरशीची बनली आहे. पुणे, अमरावती, नागपूर आणि छत्रपती संभाजीनगर येथील मतदारसंघांमध्ये मतमोजणी केंद्रांवर लगबग पाहायला मिळत आहे.

मतमोजणी केंद्रांवर सुरुवातीला 25-25 मतांचे गठ्ठे तयार करण्याची प्रक्रिया वेगाने सुरू आहे. ही निवडणूक बॅलेट पेपरवर झाल्यामुळे आणि पसंतीक्रमाने मतदान झाल्याने प्रत्यक्ष मतमोजणीला अधिक वेळ लागणार आहे. सकाळी आठ वाजता प्रक्रिया सुरू झाली असली तरी, प्रत्यक्ष मतांची मोजणी दुपारपर्यंत सुरू होण्याची शक्यता आहे. निकालाचे चित्र स्पष्ट होण्यास बराच अवधी लागू शकतो, विशेषतः जर पहिल्या पसंतीक्रमाने उमेदवाराला विजयासाठी आवश्यक असलेला कोटा पूर्ण करता आला नाही तर दुसऱ्या पसंतीक्रमाची मोजणी होऊन निकाल दुसऱ्या दिवशी लागण्याचीही शक्यता आहे.