Mahayuti Meeting: मुंबई महापालिकेसाठी महायुतीची पहिली बैठक अन् दादांच्या राष्ट्रवादीला निमंत्रण नाही!

मुंबईत महायुतीची पहिली महत्त्वपूर्ण बैठक दादर येथील वसंत स्मृती कार्यालयात सुरू झाली आहे, ज्यामध्ये मुंबई महानगरपालिका निवडणुकांसाठी भाजप आणि शिंदे गटाच्या शिवसेनेमध्ये जागावाटपावर चर्चा सुरू आहे. या बैठकीचे सर्वात महत्त्वाचे वैशिष्ट्य म्हणजे अजित पवार यांच्या नेतृत्वाखालील राष्ट्रवादी काँग्रेसला यात निमंत्रण देण्यात आलेले नाही. यामुळे महायुतीमधील घटक पक्षांमधील समन्वयावर प्रश्नचिन्ह निर्माण झाले आहे. या बैठकीला भाजपकडून आशिष शेलार, अमित साटम आणि प्रवीण दरेकर हे प्रमुख नेते उपस्थित आहेत. तर, एकनाथ शिंदे यांच्या शिवसेनेकडून राहुल शेवाळे, सिद्धेश कदम, शीतल म्हात्रे आणि प्रकाश सुर्वे हे प्रतिनिधी उपस्थित असून, उदय सामंत हे ऑनलाइन माध्यमातून बैठकीत सहभागी झाले आहेत. पक्षश्रेष्ठींनी मुंबई महापालिका एकत्र लढण्याचा निर्णय घेतल्यानंतर ही पहिलीच बैठक असल्याने याला विशेष महत्त्व प्राप्त झाले आहे.