मुंबईत आंदोलनाची परवानगी नाकारताच मनोज जरांगेंचा मोठा निर्णय, आता सलाईन आणि पाणीही…

मनोज जरांगे पाटील यांनी मराठा आरक्षणाच्या मागणीसाठी आपला लढा आणखी तीव्र केला आहे. त्यांनी आता सलाईन आणि पाणी घेण्यासही नकार दिला असून, हे सरकारला निषेध करण्याचे एक टोकदार पाऊल आहे. शासनाने आंदोलने, सभा आणि मिरवणुकांवर लादलेल्या निर्बंधांवर जरांगे पाटील यांनी तीव्र आक्षेप घेतला आहे. शनिवार, रविवार आणि सुट्ट्यांच्या दिवशी आंदोलनांना परवानगी नाकारणे, तसेच वेळेची मर्यादा घालणे हे मराठा आंदोलनाला दडपण्याचे षडयंत्र असल्याचा आरोप त्यांनी केला. जरांगे पाटील यांनी स्पष्ट केले की, ते लोकशाही आणि न्यायदेवतेच्या नियमांचे पालन करतील, शासनाच्या सोयीच्या कायद्याचे नाही.

न्यायदेवतेने कोणालाही आंदोलनापासून रोखता येणार नाही, असे सांगितल्याचे त्यांचे म्हणणे आहे. त्यांनी आरोप केला की, मुख्यमंत्री देवेंद्र फडणवीस यांच्या नेतृत्वाखालील सरकार मराठ्यांना संपवण्याचा घाट घालत आहे आणि यासाठीच कायदेशीर पेच निर्माण केला जात आहे. जरांगे पाटील यांनी १५ सप्टेंबर रोजी आपल्या गावातून निघून १९ सप्टेंबर रोजी मुंबईतील आझाद मैदानावर शांततापूर्ण उपोषण करण्याचा निर्धार व्यक्त केला. मराठे शांततेत आपला रोष व्यक्त करतील, पण ते झुकणार नाहीत, असा ठाम पवित्रा त्यांनी घेतला.