Hingoli | मध्यरात्री मराठवाडा हादरला! हिंगोलीत 4.4 रिश्टरचा भूकंप; तर नांदेड, परभणी, लातूरमध्येही….

मराठवाड्यातील हिंगोली, नांदेड, परभणी आणि लातूर जिल्ह्यांमध्ये मध्यरात्री भूकंपाचे धक्के जाणवल्याने नागरिकांमध्ये काही काळ भीतीचे वातावरण निर्माण झाले. रात्रीच्या सुमारास अचानक झालेल्या धक्क्यांमुळे अनेक नागरिक घराबाहेर पडल्याची माहिती समोर आली आहे.

प्राथमिक माहितीनुसार, हिंगोली जिल्ह्यात ४.४ रिश्टर स्केल तीव्रतेचा भूकंप नोंदवण्यात आला. हा भूकंप रात्री १ वाजून ३७ मिनिटांनी जाणवला असून, बसमत तालुक्यातील पांगरा शिंदे परिसर हा भूकंपाचा केंद्रबिंदू असल्याची माहिती समोर आली आहे.

दरम्यान, नांदेड जिल्ह्यातही ४.२ रिश्टर स्केल तीव्रतेचे धक्के जाणवल्याची नोंद झाली आहे. याशिवाय परभणी आणि लातूर जिल्ह्यांतील काही भागांमध्येही भूकंपाचे सौम्य धक्के जाणवले असल्याचे नागरिकांनी सांगितले.

सध्या या भूकंपामुळे कोणतीही जीवितहानी किंवा मोठ्या वित्तहानीची अधिकृत माहिती समोर आलेली नाही. मात्र, संबंधित प्रशासन परिस्थितीवर लक्ष ठेवून असून, कोणत्याही आपत्कालीन परिस्थितीला सामोरे जाण्यासाठी यंत्रणा सतर्क ठेवण्यात आल्या आहेत. नागरिकांनी अफवांवर विश्वास न ठेवता प्रशासनाच्या अधिकृत सूचनांचे पालन करावे, असे आवाहन करण्यात आले आहे.