Radhakrishna Vikhe-Patil : दिवाळीपूर्वीच शेतकऱ्यांसाठी मोठी बातमी! मराठवाड्यातील चार जिल्ह्यांना मिळणार पाणी; विखे पाटलांनी सांगितलं संपूर्ण नियोजन

जलसंपदा मंत्री विखे पाटील यांनी नुकतीच मराठवाड्यातील पाणीपुरवठ्याबाबत एक महत्त्वाची माहिती दिली आहे. छत्रपती संभाजीनगर, बीड, जालना आणि परभणी या चार जिल्ह्यांना पाणी मिळणार असल्याचे त्यांनी सांगितले. या जिल्ह्यांना पाणी उपलब्ध करून देण्यासाठी झालेल्या बैठकीत जायकवाडीच्या डाव्या आणि उजव्या कालव्याला प्रत्येकी तीन रबी आवर्तने आणि एक उन्हाळी आवर्तन देण्याचा निर्णय एकमताने घेण्यात आला.

या नियोजनानुसार, डाव्या कालव्याचे पहिले आवर्तन ५ नोव्हेंबर रोजी सुरू होणार आहे. दिवाळीपूर्वी पाणी सुरू करावे, या आमदार महोदयांच्या आग्रहानंतर हा निर्णय घेण्यात आला. तसेच, गोदावरी नदीवरील सात ते आठ बॅरेजेस (साधारण २०० किमीपर्यंतचा परिसर) भरून देण्याचा निर्णयही जलसंपदा खात्याने घेतला आहे. यामुळे नदीकाठच्या पिण्याच्या पाण्याच्या योजना, शेतीच्या योजना आणि चाऱ्याच्या उत्पादनालाही मदत होईल. एल निनोच्या परिणामामुळे उद्भवणाऱ्या परिस्थितीचा सामना करण्यासाठी पिण्याच्या पाण्याला प्राधान्य देत १०% पाणी राखीव ठेवण्यात आले आहे. जायकवाडीमध्ये सध्या ५८ टीएमसी पाणीसाठा उपलब्ध असून, माजलगाव प्रकल्पालाही पाणी देण्याचे नियोजन केले जात आहे.