राज ठाकरेंनी घेतली एकनाथ शिंदेंची भेट! पुन्हा काय घडतंय? राजकीय चर्चांना उधाण

महापालिका निवडणुका होऊन एक महिना उलटला असतानाच, मनसे अध्यक्ष राज ठाकरे यांनी उपमुख्यमंत्री एकनाथ शिंदे यांच्या नंदनवन निवासस्थानी भेट घेतली. सुमारे अर्धा तास चाललेल्या या भेटीने महाराष्ट्राच्या राजकारणात अनेकांच्या भुवया उंचावल्या आहेत. निवडणुकीत ठाकरे बंधूंनी एकत्रितपणे शिंदे गट आणि भाजपवर टीका केली होती, मात्र निकालानंतर कल्याण-डोंबिवलीमध्ये मनसेच्या सात नगरसेवकांनी शिंदेंच्या शिवसेनेला पाठिंबा दिला. या पार्श्वभूमीवर झालेल्या भेटीत कल्याण-डोंबिवलीतील स्वीकृत नगरसेवकांसंदर्भात चर्चा झाल्याची माहिती मिळत आहे. तसेच, मुंबईतील स्वीकृत नगरसेवकांबाबतही विचारविनिमय झाल्याचे सांगितले जाते. अचानक झालेल्या या भेटीमुळे भविष्यात राज ठाकरे आणि एकनाथ शिंदे यांच्यात काही नवीन राजकीय समीकरणे जुळतात का, याबाबत आता उत्सुकता निर्माण झाली आहे. या भेटीचा नेमका उद्देश काय होता, हे येणाऱ्या काळात स्पष्ट होईल.