Mumbai Local Megablock : मुंबई लोकलनं उद्या प्रवास करताय? बघा तिन्ही रेल्वे मार्गांवर कसा असणार मेगाब्लॉक?
मुंबईतील लोकल प्रवाशांसाठी महत्त्वाची सूचना. उद्या मध्य, पश्चिम आणि ट्रान्स-हार्बर रेल्वे मार्गांवर विशेष मेगाब्लॉक घेण्यात येणार आहे. यामुळे अनेक लोकल सेवा रद्द करण्यात आल्या असून, काही मार्गांवरील गाड्या विलंबाने धावणार आहेत किंवा वळवण्यात येणार आहेत. प्रवाशांनी प्रवासापूर्वी रेल्वेचे वेळापत्रक तपासूनच घराबाहेर पडावे, असे आवाहन रेल्वे प्रशासनाने केले आहे.
मुंबईतील लोकल प्रवाशांसाठी एक महत्त्वाची सूचना आहे. रेल्वे प्रशासनाने उद्या तिन्ही मुख्य रेल्वे मार्गांवर, म्हणजेच मध्य, पश्चिम आणि ट्रान्स-हार्बर मार्गांवर विशेष मेगाब्लॉक जाहीर केला आहे. या मेगाब्लॉकमुळे उपनगरीय रेल्वे सेवांवर मोठा परिणाम होणार असून, अनेक गाड्या रद्द करण्यात आल्या आहेत, तर काही मार्गांवर गाड्यांच्या वेळेत बदल करण्यात आला आहे. यामुळे प्रवाशांना प्रवासात मोठा त्रास सहन करावा लागण्याची शक्यता आहे.
मध्य रेल्वेवर माटुंगा ते मुलुंड दरम्यान उद्या सकाळी ११ वाजून ५ मिनिटांपासून ते दुपारी ३ वाजून ४५ मिनिटांपर्यंत अप आणि डाउन जलद मार्गांवर मेगाब्लॉक असणार आहे. या कालावधीत जलद मार्गावरील सर्व गाड्या माटुंगा स्थानकावरून धिम्या मार्गावर वळवण्यात येणार आहेत. त्यामुळे प्रवासाचा वेग मंदावून प्रवासाच्या वेळेत वाढ होण्याची शक्यता आहे. दुसरीकडे, ट्रान्स-हार्बर मार्गावरील मेगाब्लॉकचा प्रवाशांना मोठा फटका बसणार आहे. ठाणे, वाशी, नेरूळ स्थानकांदरम्यान सकाळी ११ वाजून १० मिनिटांपासून ते दुपारी ४ वाजून १० मिनिटांपर्यंत हा विशेष मेगाब्लॉक राहील. पश्चिम रेल्वेवरही बोरिवली ते गोरेगाव दरम्यान अप आणि डाउन धीम्या मार्गांवर सकाळी १० वाजल्यापासून ते दुपारी ३ वाजेपर्यंत मेगाब्लॉक असणार आहे. या वेळेत धीम्या मार्गावरील लोकल जलद मार्गावर धावतील.
