शिंदेंनी केली अडीचवर्षांच्या महापौरपदाची मागणी? मोठी अपडेट आली समोर

सूत्रांनी दिलेल्या माहितीनुसार, एकनाथ शिंदे यांच्या नेतृत्वाखालील शिवसेनेने मुंबईच्या महापौरपदासाठी अडीच वर्षांसाठी दावा केला आहे. मुंबई महानगरपालिकेत सत्ता स्थापनेसाठी आणि महापौर बसवण्यासाठी भाजपला २५ नगरसेवकांची गरज असून, त्यासाठी शिंदेंच्या शिवसेनेचा पाठिंबा आवश्यक आहे. शिवसेनेची अशी भावना आहे की भाजपने त्यांना सन्मानपूर्वक पदं सोडावीत.

या घडामोडींच्या पार्श्वभूमीवर, कालच २९ नगरसेवकांना मुंबईतील ताज लँड्स एंड या हॉटेलमध्ये पाचारण करण्यात आले होते, जिथे त्यांच्या राहण्याची व्यवस्था पुढील चार दिवसांसाठी करण्यात आली आहे. कोणतीही फूट पडू नये याची काळजी घेतली जात आहे. महाराष्ट्राचे उपमुख्यमंत्री एकनाथ शिंदे आणि मुख्यमंत्री देवेंद्र फडणवीस यांच्यात या मागणीवर चर्चा अपेक्षित आहे. मुख्यमंत्री सध्या दावोस दौऱ्यावर असून, पाच दिवसांनी परतल्यानंतर या विषयावर तोडगा काढला जाईल अशी माहिती आहे. महापौर आणि इतर पदांसाठी अद्याप आरक्षण जाहीर झालेले नाही, त्यामुळे पुढील राजकीय घडामोडी महत्त्वाच्या ठरतील.