पुन्हा नाशिकमध्ये भोंदूबाबाकडून लोकांची फसवणूक, असलं विचित्र आमिष दाखवलं की पीडित…
नाशिकमध्ये पैशांचा पाऊस पाडण्याचे आमिष दाखवून एका कुटुंबाची ₹१०.९५ लाखांची फसवणूक करणाऱ्या भोंदूबाबा हिराचंद बर्डे याला अटक करण्यात आली आहे. कळवण तालुक्यातील पिंपळे खुर्द येथे ही घटना घडली. पूजा विधीनंतर बनावट नोटा देऊन फसवणूक करण्यात आली. महाराष्ट्र अंधश्रद्धा निर्मूलन समितीने पीडितांना पुढे येण्याचे आवाहन केले आहे.
नाशिकमध्ये पैशांचा पाऊस पाडण्याचे आमिष दाखवून एका कुटुंबाची लाखो रुपयांची फसवणूक करणाऱ्या भोंदूबाबा हिराचंद बर्डे याला अटक करण्यात आली आहे. नाशिक जिल्ह्यातील कळवण तालुक्यातील पिंपळे खुर्द येथे ही घटना उघडकीस आली. आरोपी हिराचंद बर्डे याने मुंबईतील बोरिवली येथील एका कुटुंबाला पैशांचा पाऊस पाडण्याचे आमिष दाखवले होते. या भोंदूबाबाद्वारे रोख रक्कम आणि ऑनलाईन पद्धतीने सुमारे १० लाख ९५ हजार रुपये उकळण्यात आले. पूजा विधीनंतर पैशांची गोणी देण्यात आली, मात्र त्यात बनावट नोटा असल्याचे निष्पन्न झाले.
पीडित कुटुंबाने पैसे परत मागितल्यावर त्यांना जीवे मारण्याची धमकी देण्यात आली होती. या प्रकरणी हिराचंद बर्डे आणि त्याच्या एका साथीदाराला पोलिसांनी अटक केली आहे. महाराष्ट्र अंधश्रद्धा निर्मूलन समितीने या घटनेचे गांभीर्य लक्षात घेऊन अशा पीडित व्यक्तींना अभोणा पोलीस ठाण्याशी किंवा समितीच्या कार्यकर्त्यांशी संपर्क साधण्याचे आवाहन केले आहे. हा गेल्या साडेपाच महिन्यांतील राज्यातील ९३ वा गुन्हा असून, नाशिक जिल्ह्यात सर्वाधिक १४ गुन्हे नोंदवले गेले आहेत.
