12 वर्षांची प्रतीक्षा संपली! सिंहस्थ कुंभमेळ्यानिमित्त 700 वर्षांपूर्वीचे गंगा गोदावरी मंदिर भाविकांसाठी खुले

नाशिकमध्ये सिंहस्थ कुंभमेळ्याचा ध्वजारोहण सोहळा शंखनाद होऊन आज संपन्न झाला, ज्यामुळे कुंभमेळ्याला औपचारिकरित्या सुरुवात झाली आहे. या शुभप्रसंगाचे औचित्य साधत, नाशिकमधील गोदा घाट परिसरात असलेले ७०० वर्षांपूर्वीचे ऐतिहासिक गंगा गोदावरी मंदिर तब्बल १२ वर्षांनंतर भाविकांसाठी खुले करण्यात आले आहे. गुरु सिंह राशीत प्रवेश करतात, त्याच शुभ मुहूर्तावर, म्हणजेच दुपारी १२ वाजून २ मिनिटांनी, सिंहस्थ कुंभपर्वाला सुरुवात झाली आणि मंदिराचे दरवाजेही उघडले गेले.

हे मंदिर गेल्या १२ वर्षांपासून बंद होते आणि आता कुंभपर्वाच्या निमित्ताने ते पुन्हा खुले झाले आहे. पौराणिक कथेनुसार, गंगा आणि गोदावरी भागीरथी रामकुंड परिसरात एकमेकांना भेटतात, अशी श्रद्धा आहे. गौतम ऋषींनी केलेल्या गोहत्येच्या पापाचे निराकरण करण्यासाठी शंकर महादेवांनी पृथ्वीवर गंगा आणली, असे म्हटले जाते. कुंभपर्वाच्या काळात साधू-संत स्नान करतात, तेव्हा गंगेचे शुद्धीकरण होते आणि सर्व पापी लोक पापमुक्त होतात, अशी आख्यायिका आहे. हे मंदिर जोपर्यंत सिंहस्थ कुंभपर्व नाशिकमध्ये असेल तोपर्यंत भाविकांसाठी खुले राहणार असून, त्यानंतर पुन्हा १२ वर्षांसाठी बंद होईल.