चाळणी झालेल्या रस्त्यांवर ठाकरेंच्या शिवसेनेचं आंदोलन; नाशिककरांसाठी संजय राऊत मैदानात, पहा व्हिडीओ
नाशिकमधील रस्त्यांवरील खड्ड्यांमुळे होणाऱ्या अपघातांविरोधात ठाकरे गटाने खासदार संजय राऊत यांच्या नेतृत्वाखाली तीव्र आंदोलन छेडले आहे. महापालिकेविरोधात काढण्यात आलेल्या या मोर्चात प्रतीकात्मक यमराज आणि रेडा आणून नागरिकांनी आपला संताप व्यक्त केला. कुंभमेळ्याची कामे सुरू असतानाही खड्डे कायम असल्याने प्रशासनाच्या कारभारावर प्रश्नचिन्ह उपस्थित झाले आहे.
नाशिकमध्ये रस्त्यांवरील खड्ड्यांविरोधात उद्धव बाळासाहेब ठाकरे यांच्या शिवसेनेने तीव्र आंदोलन छेडले आहे. खासदार संजय राऊत यांच्या नेतृत्वाखाली हा मोर्चा नाशिक महापालिकेवर काढण्यात आला. रस्त्यांवरील खड्ड्यांमुळे वाढत्या अपघातांना आणि मृत्यूंना कारणीभूत ठरणाऱ्या प्रशासकीय निष्क्रियतेचा निषेध करण्यासाठी नागरिक मोठ्या संख्येने सहभागी झाले होते.
या मोर्च्यात प्रतीकात्मक यमराज आणि रेडा आणून खड्ड्यांमुळे होणाऱ्या मृत्यूंकडे प्रशासनाचे लक्ष वेधण्यात आले. कुंभमेळ्याची कामे सुरू असतानाही शहरातील रस्त्यांवर मोठ्या प्रमाणात खड्डे असल्याने नागरिक संतप्त आहेत. “सर्वकडे तुमची सत्ता, किती भत्ता खाल्ला” अशा आशयाचे फलक घेऊन नागरिकांनी आपला रोष व्यक्त केला. द्वारका सर्कल, मुंबई नाका आणि पाथर्डी फाटा यांसारख्या भागांत खड्ड्यांमुळे वाहतूक कोंडी आणि अपघातांचे प्रमाण वाढले आहे. संजय राऊत यांनी काल नाशिकमधील रस्त्यांची पाहणी केल्यानंतर आज हे आंदोलन पुकारले. प्रशासनाने तातडीने खड्डे बुजवून नागरिकांना सुरक्षित प्रवास उपलब्ध करून द्यावा, अशी मागणी यावेळी करण्यात आली.
